По смртта на легендарниот македонски актер Гоце Тодоровски, неговата ќерка Сашенка преку објава на Фејсбук се прости од својот татко со емотивни зборови, откривајќи дел од неговата последна животна битка.
„Го изгубивме… По голема борба го напушти овој свет. Срцето не издржа, престана да чука. Лекарите направија сѐ што можеа, но не успеаја да го спасат. Имаше огромна желба за живот“, напиша таа.
Во својата порака Сашенка му оддаде последна почит на својот татко, истакнувајќи дека неговото заминување претставува непреболна загуба за семејството.
„Лесна ти земја, татко мој. Вечен непребол. Душата не умира, а телото беше премногу истрошено. Летај со ангелите“, напиша таа.
Во објавата се присети и на блискиот пријател и кум на актерот, Ванчо, наведувајќи дека по неговата смрт дел од Гоце Тодоровски засекогаш исчезнал.
Гоце Тодоровски почина на 75-годишна возраст, оставајќи зад себе богато актерско наследство и бројни незаборавни улоги кои ќе останат трајно врежани во македонската култура.
