Градоначалникот на Скопје, Орце Ѓорѓиевски, со емотивна порака на социјалните мрежи се прости од легендарниот македонски актер Гоце Тодоровски, истакнувајќи дека Македонија загубила голем уметник, но дека неговото дело ќе живее засекогаш.
„Почивај во мир, легендо… Не постојат вистински зборови за простување од човек кој остави толку многу убавина, спомени и човечка топлина зад себе“, напиша Ѓорѓиевски.
Тој посочи дека со Тодоровски споделувал многу средби, разговори и заеднички моменти, кои, како што наведува, засекогаш ќе ги носи во своето сеќавање.
Во објавата нагласи дека Гоце Тодоровски бил дел од детството и животите на многу генерации, а со своите бројни улоги оставил неизбришлива трага во македонската култура.
„Целиот свој живот ѝ го посвети на уметноста, оставајќи зад себе богатство кое нема цена. Секоја негова улога, секој негов збор и секоја емоција на сцената остануваат како траен печат во македонската култура. Денес замина човекот, но легендата останува“, истакна Ѓорѓиевски.
Тој му се заблагодари за добрината, човечноста и придонесот кон македонската уметност, додавајќи дека луѓето како Гоце Тодоровски никогаш вистински не заминуваат, туку продолжуваат да живеат преку своите дела и во сеќавањата на оние што ги сакале.
