Клиничката болница во Тетово ќе се реконструира со инвестиција од 74 милиони евра

Клиничката болница во Тетово ќе биде целосно реконструирана, модернизирана и функционално реорганизирана преку стратешки проект вреден 4,56 милијарди денари, односно околу 74 милиони евра, соопшти министерот за здравство Азир Алиу.

— реклама —

Според него, станува збор за проект кој има цел трајно да го промени начинот на обезбедување здравствени услуги во Полошкиот регион, преку примена на најдобри меѓународни практики и комбинирање на државни средства со финансии од меѓународни институции.

— реклама —

Проектот предвидува целосна реконструкција и модернизација на постојните објекти, набавка на современа медицинска опрема, како и функционално поврзување на болничките капацитети со топли коридори за побезбедно движење на пациентите и персоналот.

Дополнително, планирана е изградба на две нови современи згради, со што болницата ќе се трансформира во интегриран здравствен систем подготвен за идните потреби.

— реклама —

Министерот истакна дека проектот има и образовна компонента, бидејќи во соработка со Универзитетот во Тетово ќе се овозможат подобри услови за обука на студентите по медицина и развој на здравствениот кадар.

— реклама —

Тој нагласи дека целта е создавање современа здравствена установа што ќе обезбедува навремени и квалитетни услуги за граѓаните од регионот, како и подигнување на стандардите во здравствениот систем.