Цената на авионскиот билет не секогаш ја покажува целосната сума што патникот ќе ја плати за едно патување. Истражување на порталот AirAdvisor, кое опфатило 23 европски авиокомпании, покажува значителни разлики во трошоците меѓу превозниците.
Рангирањето е направено според показателот RASK (Revenue per Available Seat Kilometre), кој го мери приходот што авиокомпанијата го остварува по расположливо седиште и поминат километар. Во пресметката се земаат предвид и дополнителните трошоци, како багажот и изборот на седиште. Колку е повисок RASK, толку во просек е поскап летот.
На врвот на листата на најскапи европски авиокомпании е норвешкиот регионален превозник Widerøe, со RASK од 0,32 евра. Високата цена се поврзува со неговите летови до оддалечени локални аеродроми.
Меѓу големите национални авиокомпании, најскапа е British Airways со RASK од 0,0888 евра. По неа следуваат Air France и Austrian Airlines со по 0,0850 евра, Lufthansa со 0,0845 евра и Aegean Airlines со 0,0839 евра.
На спротивниот крај се наоѓа унгарската нискобуџетна авиокомпанија Wizz Air, која со RASK од 0,0433 евра е најповолна според истражувањето. Следуваат easyJet со 0,0521 евра и Ryanair со 0,0556 евра.
Меѓу традиционалните национални превозници, најприфатлива опција е Finnair, со RASK од 0,0622 евра.
Според анализата, изборот на нискобуџетен превозник наместо поскапа авиокомпанија може да донесе заштеда од околу 50 евра по лет на просечните европски релации.
