Кој ќе го наследи Трамп во Белата куќа? Републиканците ги фаворизираат Рубио и Венс

Американскиот државен секретар Марко Рубио и потпретседателот Џеј Ди Венс се издвојуваат како најпосакувани потенцијални кандидати на републиканците за претседателските избори во 2028 година. Кај демократите, најголема поддршка засега добиваат Џон Осаф и Пит Бутиџиџ, покажува истражувањето на „Ројтерс“ и „Ипсос“.

Според анкетата, 45 отсто од републиканските гласачи сметаат дека Рубио би бил одличен претседателски кандидат, додека 43 отсто го делат истото мислење за Венс. Меѓу демократските гласачи, Осаф и Бутиџиџ добиле по 29 отсто поддршка како одличен избор.

— реклама —

Истражувањето било спроведено меѓу 1.705 полнолетни Американци, меѓу кои околу 500 регистрирани гласачи од секоја партија. Анкетата завршила во понеделникот, а маргината на грешка за партиските гласачи изнесува пет процентни поени. Ниту еден од споменатите политичари досега официјално не започнал претседателска кампања.

Републиканците сè уште се поделени околу тоа дали нивниот следен кандидат треба да се дистанцира од Доналд Трамп или да продолжи со неговата политика. Кај демократите, пак, се води дебата за начинот на кој треба да му се спротивстават на актуелниот претседател, вклучително и за можноста за покренување постапка за негово отповикување.

— реклама —

Трамп веќе ги прашувал своите сојузници дали повеќе го поддржуваат Венс или Рубио, но во интервју за емисијата „60 минути“ на телевизијата Си-Би-Ес изјавил дека не мора да поддржи ниту еден од нив во републиканската внатрепартиска трка.

По Рубио и Венс, меѓу републиканците најчесто се споменува гувернерот на Флорида, Рон Десантис, кого 32 отсто од испитаниците го оцениле како одличен кандидат. Во можните кандидати се вбројува и синот на Трамп, Доналд Трамп Помладиот.

Рубио, кој ја извршува функцијата главен американски дипломат, не учествувал во повеќе неуспешни мировни преговори со Иран, додека Венс јавно оценил дека тешкиот пораз на републиканците на меѓуизборите е последица на војната.

— реклама —

Од демократската страна, Осаф во изминатите месеци привлече внимание со остри критики кон Трамп, кого го нарече корумпиран и недостоен за јавна функција. Минатата недела во Џорџија обезбедил реизбор со предност од 18 процентни поени, откако Трамп во оваа сојузна држава во 2024 година победил со разлика од само два процентни поени.

Бутиџиџ, поранешен министер за транспорт, има поголема препознатливост на национално ниво, меѓу другото и поради претседателската кандидатура во 2020 година. Сепак, околу една петтина од демократските гласачи изјавиле дека никогаш не слушнале за него, додека приближно една третина го кажале истото за Осаф. Кај републиканците, пак, многу мал број не знаат кој е Венс, додека околу една шестина не го препознаваат Рубио.

— реклама —

Поранешната потпретседателка Камала Харис и гувернерот на Калифорнија, Гевин Њусом, исто така добиле поддршка од по 23 отсто од демократите како одлични потенцијални кандидати. Таква оценка за Александрија Окасио-Кортез дале 15 отсто од испитаниците.

Окасио-Кортез неодамна изјавила дека покренувањето постапка за отповикување на Трамп треба да биде една од опциите, додека Бутиџиџ во интервју за списанието „Њујоркер“ рекол дека не е особено заинтересиран за таква постапка.