По сведоштва на граѓани за наводна незаконска наплата за влез и попречување на пристапот до природниот локалитет Куклица, познат како „Камените кукли“, Ина Многуфина објави реакција на социјалните мрежи во која побара институциите да ги испитаат наводите и да утврдат кој наплаќа и по кој основ.
Во својата објава таа потсетува на легендата за скаменетата свадба, според која несреќно вљубена девојка ги проколнала младенците и свадбарите, кои се претвориле во камен. Истовремено, ги наведува и научните објаснувања според кои уникатните камени формации се создале пред околу десет милиони години како резултат на природни геолошки процеси.
Многуфина нагласува дека станува збор за природна реткост и заштитен локалитет кој нема сличен пример во светот, поради што, според неа, е недозволиво посетителите да се соочуваат со нејасни правила за наплата.
„Имаме луѓе што наплаќаат, не се знае ценовник, не се знае кои се, нема фискални сметки и тоа трае со години“, наведува таа во објавата.
Таа прашува дали надлежните институции извршиле контроли и дали е утврдено каде завршуваат средствата што се собираат од посетителите, посочувајќи дека ваквите ситуации испраќаат лоша порака за развојот на туризмот.
Во реакцијата се споменува и дека градоначалникот претходно поднел кривична пријава поврзана со случајот, но според Многуфина тоа не довело до конечно решавање на проблемот.
Локалитетот Куклица, кој е меѓу најпознатите природни знаменитости во државата, секоја година привлекува голем број домашни и странски туристи токму поради својата единствена геолошка појава и легендите поврзани со неа.
