Судот определи мерка притвор за 41-годишна жителка на Кратово, по предлог на Основното јавно обвинителство Куманово, поради сомнение дека сторила кривични дела спречување службено лице во вршење службено дејствие и узурпација.
Според Обвинителството, осомничената подолг период незаконски го узурпирала локалитетот „Куклица“, кој е прогласен за споменик на природата, при што без правен основ им наплаќала влезници на посетителите, се расправала со нив и им упатувала закани, нарушувајќи го јавниот ред и мир.
При последниот инцидент, како што се наведува, таа физички ги нападнала и ги спречила полициските службеници кои се обиделе да ја легитимираат и приведат.
Обвинителството посочува дека против неа веќе се води постапка за продолжено кривично дело узурпација на локалитетот „Куклица“, при што ѝ биле изречени мерки на претпазливост, меѓу кои и забрана за посета на локацијата. Сепак, според обвинителот, таа не ги почитувала донесените мерки.
Дополнително, се наведува дека осомничената и нејзиниот сопруг и претходно биле инволвирани во случај на спречување службени лица при вршење службени дејствија кон пазарни инспектори.
Имајќи ја предвид опасноста од бегство и можноста да продолжи со извршување кривични дела, јавниот обвинител побарал определување притвор, а судот го прифатил предлогот и ја определил мерката.
