Којиќ: Поликлиниката „Железара“ модернизирана со нов кадар и инвестиции во медицинска опрема

Поликлиниката „Железара“ во изминатите две години го проширила медицинскиот тим, набавила современа опрема и го зголемила обемот на здравствени услуги, информираше директорката Лилјана Којиќ, презентирајќи го отчетот за работата на установата.

Којиќ посочи дека при преземањето на раководењето во ноември 2024 година, поликлиниката се соочувала со недостиг од медицински кадар, застарена и несервисирана опрема и потреба од подобрување на условите за работа.

— реклама —

Во изминатиот период биле обезбедени нови работни места за лаборант, медицински сестри, административен персонал и тројца лекари, од кои двајца специјалисти.

Меѓу набавената опрема се DEXA скенер, апарат за терапија со ударни бранови, два ЕКГ-апарати, два спирометри, апарат за имунохемиски анализи и современа опрема за кабинетот за уво, нос и грло. Во тек се и дополнителни набавки за потребите на физикалната медицина.

— реклама —

Зголемениот обем на работа го покажуваат и податоците за 2025 година, кога биле реализирани 14.637 интернистички, 6.286 ОРЛ, 5.913 радиолошки, 3.918 офталмолошки и 2.870 дерматолошки прегледи, како и 16.863 лабораториски анализи.

— реклама —

Според Којиќ, установата истовремено ја одржува финансиската стабилност, без загуби и долгови кон комуналните претпријатија и другите доверители. Буџетот е зголемен од 59 милиони денари во 2025 на 64 милиони денари во 2026 година, со редовна исплата на платите и продолжување на инвестициите.

„Нашата определба е здравствената заштита да биде подостапна, поквалитетна и поблиску до граѓаните. Не е доволно институциите само да функционираат – тие мора да се менуваат, да се модернизираат и да испорачуваат конкретни резултати“, истакна Којиќ.

— реклама —

Во наредниот период развојот ќе биде насочен кон зајакнување на интернистичкиот сервис, развој на пулмологијата, кардиологијата и ендоскопската дијагностика, отворање современ детски диспанзер и унапредување на превентивната здравствена заштита.

Од Движењето ЗНАМ за Наша Македонија посочуваат дека институционалната одговорност подразбира отчетност пред граѓаните, одговорно управување со јавните средства и остварување конкретни резултати.