Конорс го пофали Ѓоковиќ, но упати критики кон помладата тениска генерација

Триумфот на Новак Ѓоковиќ во Пекинг, каде што ја освои својата 102. титула во кариерата, предизвика реакции и кај легендарниот американски тенисер Џими Конорс. Тој го пофали српскиот ас, но истовремено оцени дека неговите успеси ги откриваат слабостите на помладата генерација тенисери.

— реклама —

Ѓоковиќ уште еднаш покажа дека и на 39-годишна возраст може да се натпреварува со значително помлади противници. Токму тоа го поттикна Конорс да се запраша зошто новите тениски таленти сè уште не успеваат да ги потиснат поискусните играчи од врвот.

— реклама —

„Овој трофеј само потврдува дека Ѓоковиќ е исклучително добар, но истовремено открива и одредени слабости на денешниот тенис“, порача Конорс.

Американецот се потсети и на сопствената кариера, посочувајќи го враќањето на терените по повреда на зглобот на раката. Иако поради повредата паузирал година и пол, на 39-годишна возраст успеал да стигне до полуфиналето на Отвореното првенство на САД.

— реклама —

Според Конорс, ваквите резултати треба да бидат предупредување за помладите тенисери, кои се во најдобрите години за професионален спорт, но сè уште не успеваат да ги преземат водечките позиции.

„Кога се вратив по повредата на зглобот и стигнав до полуфиналето на Отвореното првенство на САД на 39 години, тоа на некој начин го сврте вниманието кон состојбата во тенисот. Покажа дека новите таленти на 23, 24 или 25 години можеби треба малку повеќе да се активираат и да почнат да ги заземаат местата што треба да им припаѓаат“, заклучи Конорс.