Документарниот филм „Новак Ѓоковиќ: Волкот во зима“ (Novak Djokovic: The Wolf in Winter) ќе има премиера на 20 август на платформата Amazon Prime.
Филмот го следи животниот пат на српскиот тенисер – од неговото детство, преку тешките години исполнети со воени конфликти и финансиски проблеми, до освојувањето на самиот врв на светскиот тенис.
„Ѓоковиќ порасна среде конфликти и финансиски тешкотии, додека неговото семејство жртвуваше сè за да ја поддржи неговата тениска кариера. Кога се појави на професионалната сцена, не беше пречекан со раширени раце, туку со отпор, како непожелен натрапник што го нарушуваше омиленото ривалство меѓу Федерер и Надал“, се наведува во описот на филмот.
Во трејлерот се појавуваат Андре Агаси, Рафаел Надал и други големи имиња од светот на тенисот, кои зборуваат за кариерата и влијанието на Ѓоковиќ.
Режисер на документарецот е Џејсон Хехир, автор на култниот документарен серијал за Мајкл Џордан „The Last Dance“ („Последниот танц“).
