Косовскиот парламент ја отфрли пресудата за воени злосторства против Тачи

Косовското собрание денеска усвои декларација со која го оспорува заклучокот од првостепената пресуда против четворицата поранешни водачи на Ослободителната војска на Косово (ОВК) дека дејствувале во рамките на заеднички злосторнички потфат.

— реклама —

За декларацијата гласаа 99 пратеници, без гласови против и воздржани. Во документот се изразува загриженост поради пресудата против Хашим Тачи, Кадри Весели, Реџеп Селими и Јакуп Красниќи, а како неприфатлив се оценува заклучокот за постоење заедничка злосторничка цел и одговорноста што врз таа основа им е припишана на обвинетите.

— реклама —

Во декларацијата се наведува и дека владеењето на правото го опфаќа правото пресудата да биде оспорена преку предвидените правни постапки.

Специјализираните совети на Косово во Хаг на 16 септември ги прогласија четворицата за виновни за воени злосторства, меѓу кои незаконско или произволно лишување од слобода, сурово постапување, тортура и убиства. Хашим Тачи и Јакуп Красниќи беа осудени на по 25 години затвор, Кадри Весели на 18 години, а Реџеп Селими на 13 години.

— реклама —

Судскиот совет утврдил дека четворицата се кривично одговорни за незаконско или произволно апсење и лишување од слобода на најмалку 385 лица, сурово постапување кон најмалку 49 лица, тортура на 303 лица и убиства на најмалку 96 лица. Во истата пресуда, тие биле ослободени од обвиненијата за злосторства против човештвото.

Декларацијата усвоена во косовското собрание го изразува ставот на пратениците, но самото гласање не ја менува судската пресуда. Прашањата поврзани со утврдената одговорност и евентуалните жалби остануваат во рамките на судската постапка.