Потпретседателот на Сојузот на синдикати на Македонија, Иван Пешевски е децидден дека ако нема минимална плата од 18.000 денари, тогаш, Македонија ќе биде блокирана со протести.
Повеќе од сигурно ќе очекувате бидејќи ние немаме назад каде да одиме, толку сме притиснати од луѓето, од членството, работниците да нема што ние да попуштаме или да преговараме за понизок износ. Она што ќе го видите од четврток натаму ќе биде токму тоа – блокирање на фабрики, институции, улици и.т.н“, порача Пешевски
Минатата недела не беше постигнат договор. Синдикатите ги обвинија работодавачите дека даваат несериозни предлози и наместо да го гледаат најдоброто за работниците, тие ги гледаат само своите интереси. Работодавачите пак, бараат доколку ги покачат платите до 18.000 денари, тогаш Владата да им ги субвенционира придонесите. За работодавачите е прифатливо минималната плата да биде 16.300 денари.
Владата е на страната на работниците – покачувањето на минималната плата ќе биде исполнето, напиша денеска на својот фејсбук профил премиерот Димитар Ковачевски.
Отворениот социјален дијалог со сите засегнати страни, порачува, е она кое ќе не одведе до најсоодветното решение кое е во интерес на работниците.
– Очекувам уште утре да имаме решение за покачување на минималната плата. Како што ветив, ефикасно ќе ги решаваме сите прашања во интерес на граѓаните и ќе ги исполнување ветувањата. Тоа е принципот и духот во кој ќе се решаваат сите прашања кои целат кон подигање на животниот стандард на граѓаните, пишува Ковачевски.
Разговорите, според најавите, треба да продолжат откако денес на седница на Економскиот совет на Владата ќе биде разгледано се за што е разговарано досега, како и најновиот предлог на Бизнис конфедерацијата да се субвенционира дел од зголемувањето на минималната плата.
