Крај на претседателскиот мандат на Вучиќ: Поднесе оставка, Ана Брнабиќ ја презема функцијата

Александар Вучиќ вечерва поднесе оставка од функцијата претседател на Србија, по повеќе од девет години поминати на чело на државата и два претседателски мандата.

Вучиќ најпрво им се обрати на граѓаните собрани пред седиштето на Претседателството на Андриќев венец, а потоа и официјално ја соопшти својата одлука.

— реклама —

Тој порача дека функцијата претседател на Србија за него била најголема чест и дека се трудел да ѝ служи на земјата „верно, чесно и поштено“. Како причина за оставката наведе дека сака на претстојните парламентарни избори да учествува како обичен граѓанин.

Во обраќањето Вучиќ направи пресек и на периодот во кој беше претседател, зборувајќи за економијата, вработеноста, инфраструктурата и отворањето нови производствени капацитети.

— реклама —

Меѓу областите во кои призна дека власта направила сериозни грешки го издвои образованието.

„Направивме страшни грешки кои скапо ќе нѐ чинат во децениите што доаѓаат“, рече Вучиќ, зборувајќи за состојбите во просветата и високото образование.

Во последните денови од мандатот донел и одлуки за аболиција и помилување на вкупно 49 лица. Според неговата изјава, 23 од нив се поврзани со настаните што ја одбележаа Србија во изминатата година и половина.

— реклама —

Со оставката на Вучиќ, претседателските овластувања ги презема претседателката на Народното собрание, Ана Брнабиќ.

Според српскиот Закон за претседател, претседателот на Народното собрание може да ја врши функцијата претседател на Републиката најмногу три месеци. Новите претседателски избори треба да се одржат најдоцна три месеци од престанокот на мандатот, што значи најдоцна до 27 декември.

— реклама —

Оставката доаѓа помалку од еден месец пред вонредните парламентарни избори во Србија, закажани за 25 октомври. Вучиќ претходно ја распушти Народната скупштина и ги распиша изборите, а Републичката изборна комисија ја прогласи листата „Александар Вучиќ – Обединета Србија“, на која Вучиќ е прв кандидат.

Со денешната оставка завршува периодот на Вучиќ како претседател на Србија, функција на која првпат беше избран во 2017 година, а потоа освои и втор мандат.