Непријатен инцидент им се случил на македонски туристи и на нивни пријатели од Шпанија и Португалија за време на престојот во Грција, откако крадци провалиле во нивниот автомобил и однеле пасоши, пари и други лични документи.
Според нивното сведочење, по посетата на Сивири, застанале на паркинг во близина на Сахара Бич, кај Неа Каликратија, за да ручаат. Кога се вратиле до возилото, забележале дека тоа било насилно отворено.
Од автомобилот исчезнале пет пасоши, меѓу кои македонски, шпански и португалски, како и готовина и други важни документи.
Кражбата веднаш била пријавена во грчката полиција, која извршила увид и започнала истрага. Според оштетените, снимките од безбедносните камери покажуваат жена за која постои сомневање дека е поврзана со случајот.
По непријатното искуство, туристите ги предупредуваат сите што летуваат во Грција да не чуваат пасоши, пари и други вредни предмети во паркираните автомобили, без разлика дали локацијата изгледа безбедна или е во близина на туристички објекти.
