Рускиот претседател Владимир Путин и понатаму е подготвен за разговор со американскиот претседател Доналд Трамп, иако меѓу двајцата не се одржал телефонски разговор по Самитот на НАТО во Анкара, соопшти Кремљ.
Портпаролот на Кремљ, Дмитриј Песков, изјави дека Трамп бил ангажиран со бројните средби за време на посетата на турската престолнина, поради што не дошло до контакт меѓу двајцата лидери.
„Господинот Трамп очигледно беше многу зафатен по сите контакти во Анкара, па вчера немаше повик. Но претседателот Путин секогаш е отворен за дијалог“, изјави Песков, пренесува Anadolu.
Тој додаде дека, и покрај разликите во ставовите, Путин и Трамп водат конструктивен дијалог кога разговараат.
Изјавата доаѓа еден ден откако Трамп на маргините на Самитот на НАТО се сретна со украинскиот претседател Володимир Зеленски и други светски лидери. По средбата, американскиот претседател изјави дека и Путин и Зеленски сакаат да се стави крај на војната во Украина, како и дека САД се подготвени, доколку биде потребно, да го заштитат украинското небо како дел од безбедносните гаранции за Киев.
Трамп најави и дека една од темите ќе биде можноста Украина да добие дозвола за производство на ракетите „Патриот“, оценувајќи дека на тој начин Киев нема да може да тврди дека не добива доволна поддршка.
Осврнувајќи се на оваа најава, Песков изјави дека Вашингтон продолжува да ја снабдува Украина со оружје и воена технологија, но истовремено останува ангажиран во обидите за олеснување на мировниот процес.
Според него, евентуалното затворање на украинското небо би значело поголемо ангажирање на НАТО на украинска територија, што, како што рече, би можело дополнително да ја зголеми ескалацијата на конфликтот.
Песков предупреди дека натамошното заострување на состојбата може да ја продолжи војната и да ја принуди Русија да создаде поголема тампон-зона, оценувајќи дека чекорите што водат кон ескалација нема да придонесат за мировниот процес.
