Критики, навреди и пцости во Собранието: Гаши денеска се откажа од Законот за нетранспарентно трошење за проектот Скопје – Европска престолнина 2028

По бурата остри реакции и критики во јавноста и навредите и пцостите во собраниската сала, спикерот Африм Гаши Законот за Скопје – европска престолнина на културата 2028 година не го стави на дневниот ред на денешната 119-та собраниска седница.

Ова е компромисното решение утврдено на вонредната координација на Гаши со координаторите на пратеничките групи.

— реклама —

На почетокот на заседанието, опозицијата со остри процедурални забелешки и кавги не дозволи да се утврди дневниот ред со ваков закон.

Опозицијата од албанскиот блок со процедурални забелешки не дозволуваше да почне седницата. Пратениците од ДУИ, Албанска лига и Алијанса за Албанците го критикуваа Гаши дека го прекршува Деловникот.

— реклама —

И јавноста и опозициските партии жестоко реагираа на законскиот предлог со кој се предвидува за спроведување на овој проект, Градот Скопје да основа Фондација „Европска престолнина на културата – Скопје 2028 година“ и за набавките на таа Фондација да не се применува Законот за јавните набавки.

— реклама —

За овој проект се предвидени 21 милион евра, од кои 95 отсто се средства од државниот буџет и буџетот на Град Скопје, а 500.000 евра од европските фондови. Постапките ќе ги спроведува Фондацијата „Скопје европска престолнина на културата“, каде градоначалникот Орце Ѓорѓиевски за директор го
назначи ексдиректорот на Македонската радиотелевизија Марјан Цветковски.

И Државната комисија за спречување на корупцијата предупреди дека секое исклучување од Законот за јавните набавки мора да биде јасно образложено, пропорционално и да содржи силни механизми за спречување на корупција и злоупотреба на јавните средства.

Комисијата нагласува дека транспарентноста, конкуренцијата, отчетноста и контролата не смеат да бидат загрозени, без оглед на моделот за реализација на проектот „Скопје – Европска престолнина на културата 2028“.

ДКСК сметаше дека носењето посебни закони што ги заобиколуваат системските закони претставува висок корупциски ризик и бара ваквите законски решенија претходно да бидат разгледани од Комисијата.