Основниот кривичен суд Скопје ја потврди информацијата што претходно ја објави „Скопје1“ дека до Судот е доставен нов предлог за определување мерки за обезбедување присуство против Дејан Јованов-Деко, сопственикот на дискотеката „Пулс“ во Кочани, кој веќе се наоѓа во притвор во предметот за пожарот во кој загинаа 63 лица.
Од Кривичниот суд за „Скопје1“ велат дека предлогот од Обвинителството пристигнал доцна попладнево и дека по него ќе се постапува утре.
„Доцна попладнево до Судот од Обвинителството е доставен предлог за определување нови мерки за обезбедување присуство против Дејан Јованов, кој веќе е во притвор за предметот поврзан со пожарот во Кочани. По истиот ќе се постапува во текот на утрешниот ден, за што ќе бидете дополнително известени“, велат од Основниот кривичен суд Скопје.
„Скопје1“ претходно објави дека станува збор за нов предмет по кој постапува Обвинителството за гонење организиран криминал и корупција и дека адвокатката на Јованов, Ивана Коцевска, добила покана за утре во 10 часот пред судија на претходна постапка.
Коцевска за „Скопје1“ изјави дека станува збор за предлог за притвор по ново кривично дело против нејзиниот клиент. Според одбраната, рочиштето доаѓа само еден ден пред 3 октомври, кога на Јованов му истекува притворот по сила на закон во предметот за пожарот во „Пулс“.
Адвокатката претходно предложила гаранција за обезбедување на присуството на Јованов во текот на постапката. Таа тврди дека уште пред две недели предупредила дека очекува да биде отворен нов предмет и да се побара нов притвор.
„Претчувствував дека притисокот од јавноста ќе ги принуди органите да создадат ново дело и да дадат нов притвор, токму тоа и се случува“, изјави Коцевска за „Скопје1“, оценувајќи го постапувањето како „конструкција“ и „злоупотреба на правата“ на нејзиниот клиент.
Овие оценки се став на одбраната, додека за предлогот доставен од Обвинителството треба да одлучува судија на претходна постапка.
Од Кривичниот суд засега не соопштуваат детали за новиот предмет, ниту какви конкретно мерки се предложени против Јованов. Повеќе информации најавуваат по утрешното постапување.
