Основниот кривичен суд Скопје определи нова мерка притвор во траење од 30 дена за Д.Ј. од Кочани, првообвинет во предметот „Пулс“, по предлог на Јавното обвинителство за гонење на организиран криминал и корупција.
Судијата на претходна постапка, по произнесувањето на осомничениот во присуство на неговиот бранител и по разгледувањето на фактите и доказите приложени кон предлогот, го прифатил барањето за определување притвор.
Како причини се наведени опасноста осомничениот да се даде во бегство, како и основаниот страв дека може да ја попречува истрагата со влијание врз сведоци.
Новата мерка притвор ќе започне да се извршува од 3 октомври 2026 година, бидејќи Д.Ј. во моментов веќе издржува притвор во предметот поврзан со пожарот во дискотеката „Пулс“.
Во новоотворената истрага, за која е определен притворот, Д.Ј. е осомничен за кривично дело „Давање поткуп“ од член 358 став 1 од Кривичниот законик.
Од Судот информираат дека, со оглед на тоа што досегашниот притвор во предметот „Пулс“ го издржувал во КПУ Затвор Куманово, новата мерка ќе ја издржува во Затвор Скопје, согласно правилата за спровод и издржување на мерките за обезбедување присуство.
Одбраната денеска го повлекла предлогот за укинување на претходно определениот притвор во предметот „Пулс“ со определување гаранција од околу 200.000 евра во недвижен имот. Судот посочува дека, согласно законските одредби, претходно определениот притвор може да трае една година по оценувањето на обвинителниот акт, а тој рок истекува утре.
Против решението за новиот притвор, одбраната има право на жалба до Кривичниот совет.
