Кривична пријава против вработен во Управа за имотно-правни работи за злоупотреба и фалсификати

МВР соопшти дека СВР Куманово поднело кривична пријава против Р.А. (45) од Куманово, вработен во Министерството за финансии – Управа за имотно-правни работи, Подрачно одделение Куманово, поради постоење основи на сомнение за повеќе кривични дела, меѓу кои „злоупотреба на службена положба и овластување“, „фалсификување или уништување деловни книги“ и „фалсификување исправа“.

— реклама —

Според МВР, пријавениот овозможил донесување и спроведување на решенија за приватизација на градежно земјиште во државна сопственост во корист на Д.Б. и Н.А.А., со што, како што се наведува, било нарушено работењето на управната постапка и овозможено стекнување државен имот без правен основ.

— реклама —

Во предметите, како што се посочува, била утврдена недозволена промена на идентитетот на подносителите, при што решенијата биле издадени на лица различни од оние заведени во службените евиденции.

Дополнително се наведува дека документацијата не била соодветно евидентирана, содржела контрадикторни податоци, а дел од неа не била достапна, што создава сомнежи за нејзино прикривање или уништување.

— реклама —

Според МВР, во решенијата биле внесувани невистинити податоци и наведени непостоечки записници, а не било известено ниту Државното правобранителство, иако тоа е законска обврска.

— реклама —

Се додава дека со ваквото постапување е овозможено противправно стекнување на државен имот и е нарушена законитоста на управната постапка.