Владата на вчерашната седница донесе одлука за прогласување кризна состојба на целата територија на Македонија поради зголемените ризици и опасности од пожари на отворен простор и шумски пожари.
Кризната состојба ќе трае 30 дена, почнувајќи од 1 август 2026 година.
Како што соопшти Владата, одлуката е донесена со цел навремено, координирано и ефикасно справување со состојбата на терен, како и максимално мобилизирање на сите расположливи институционални капацитети за заштита на животите на граѓаните, нивниот имот и природните ресурси.
Со одлуката се активира Главниот штаб при Центарот за управување со кризи, кој ќе биде во постојано заседавање и во рок од 24 часа треба да изготви акциски план за превенција и справување со пожарите, преглед на расположливите човечки и материјално-технички ресурси, како и план за координирано дејствување на сите надлежни институции.
Истовремено, Владата ги задолжи сите органи на државната управа да постапуваат согласно прописите за управување со кризи и целосно да ги стават на располагање своите капацитети за навремена и ефикасна реакција на терен.
Од Владата посочуваат дека со оваа одлука се потврдува определбата за проактивно дејствување, целосна мобилизација на институциите и координиран одговор за заштита на граѓаните, животната средина и националните ресурси.
