Крвав напад во стан во Карпош: Двајца Турци повредени со остар предмет, двајца уапсени, трет се бара

Двајца турски државјани се уапсени во Скопје под сомнение за обид за убиство на двајца нивни сонародници во стан на подрачјето на Карпош. Полицијата трага по уште едно лице, исто така од Турција, за кое постои сомнение дека учествувало во нападот.

— реклама —

Според информациите од Министерството за внатрешни работи, осомничените К.М. (36) и С.Б.П. (22), заедно со трето лице, физички нападнале двајца 26-годишни турски државјани и им нанеле повреди со остар предмет.

— реклама —

Во моментот на нападот во станот се наоѓале и две жени. По нападот, тројцата осомничени побегнале од местото на настанот.

По преземените полициски мерки, К.М. и С.Б.П. биле пронајдени и лишени од слобода на улицата „Јадранска Магистрала“ во Скопје.

— реклама —

Единицата за насилен криминал, односно Одделението за крвни и сексуални деликти при СВР Скопје, по брза постапка поднело кривична пријава против двајцата уапсени за „убиство во обид“, согласно член 123 во врска со член 19 од Кривичниот законик.

Од МВР информираат дека продолжуваат активностите за пронаоѓање на третиот осомничен.