Територијата останува главната пречка за постигнување договор меѓу Украина и Русија, изјави специјалниот пратеник на американскиот претседател Доналд Трамп, Џаред Кушнер, на форумот YES 2026 во Киев.
„Главното прашање ќе биде територијата. Токму за тоа страните сè уште немаат постигнато договор“, рече Кушнер.
Според него, рускиот претседател Владимир Путин јасно ги поставил своите цели, но Украина засега не е подготвена да прифати повлекување до линијата што ја бара Москва. Кушнер оцени дека, доколку Киев се согласи на такво повлекување, останатите услови за договорот би можеле полесно да бидат усогласени.
„Нашата задача како посредник е да најдеме креативно решение што нема да биде спротивно на нивните желби“, изјави пратеникот на Трамп.
Кушнер нагласи дека САД сакаат да најдат формула што ќе овозможи завршување на конфликтот, но истовремено ќе спречи повторување на слична војна во иднина. Тој оцени дека и Киев и Москва чувствуваат „многу болка“ и дека двете страни сакаат војната да заврши.
Според Кушнер, Трамп е „многу, многу посветен“ на постигнувањето на тој резултат, заедно со него и со другиот американски пратеник, Стив Виткоф. На прашањето дали примирјето би можело да биде постигнато до зимата, Кушнер не даде конкретен рок.
Американскиот пратеник откри и дека во изминатите месеци САД, Русија и Украина разговарале за идната безбедносна архитектура, вклучително и за безбедносните гаранции за Украина по завршувањето на војната.
Целта, како што објасни, е Киев по евентуалниот договор да има уверување дека конфликтот навистина е завршен и дека се создадени услови за долгорочна стабилност.
„За Украина, суверенитетот, безбедноста и просперитетот се трите столба на секој праведен исход“, нагласи Кушнер.
Тој додаде дека на последните трилатерални преговори во Абу Даби биле разгледувани механизми за спречување нови конфликти, како и нивно следење и контрола.
Кушнер посочи дека откако ќе бидат решени прашањата за територијата и линијата на фронтот, треба да биде воспоставен механизам што ќе го почитуваат сите страни и чија примена ќе може да се контролира.
Како следен чекор тој ги наведе економските договори, кои би требало да помогнат во обновата по војната. Според него, Украина и Русија треба да го искористат мирот за привлекување инвестиции, отворање нови работни места и развој на економијата, додека заедничкиот економски интерес за стабилност би можел да биде дополнителна гаранција за траен мир.
