Претседателот на Барселона, Жоан Лапорта, потврди дека каталонскиот клуб во текот на летниот преоден рок се обидел да го ангажира напаѓачот на Интер, Лаутаро Мартинез.
Лапорта откри дека Лаутаро бил посакуван како потенцијална замена за Роберт Левандовски, но Интер не сакал да преговара за негово заминување.
„Сè е вистина, го сакав Лаутаро по секоја цена. Тој е извонреден фудбалер и не сакавме да ни избега. Затоа му се јавив на претседателот Марота и тој ми рече дека играчот не е на продажба“, изјави Лапорта за „Кориере дело Спорт“.
Тој додаде дека, со оглед на ставот на Интер да го задржи аргентинскиот напаѓач, Барселона се повлекла од обидот да го реализира трансферот.
„Потоа, во секој случај, не би бил играчот тој што ќе одлучи дали ќе замине или не, бидејќи Интер сакаше да го задржи. Така, од почит кон Бепе, кого многу го ценам, се повлековме“, рече Лапорта.
Претседателот на Барселона зборуваше и за Сеск Фабрегас, кого го опиша како човек кој одлично го познава начинот на работа и фудбалската визија на каталонскиот клуб.
„Сеск го познава менталитетот и визијата на Барселона подобро од кој било друг. Тука е израснат и ова секогаш ќе биде неговиот дом. Ни се допаѓа и неговиот начин на разбирање на фудбалот, но сега имаме голем тренер како Флик. И видовте што е во состојба да направи“, изјави Лапорта.
Во интервјуто тој се осврна и на Суперлигата, потсетувајќи дека Барселона била меѓу основачите на ЕКА и дека идеите на клубот влијаеле врз промените од кои денес имаат корист фудбалските клубови.
