Рускиот министер за надворешни работи, Сергеј Лавров, изјави дека бил изненаден од оценката на американскиот државен секретар Марко Рубио дека Русија не е подготвена на компромиси во преговорите со Украина.
Лавров посочи дека Москва ги прифатила предлозите на американскиот претседател Доналд Трамп за првични чекори кои би овозможиле прекин на непријателствата и почеток на мировни преговори.
„Ме изненади што Марко Рубио изјави дека шансите за завршување на конфликтот оваа година не се големи затоа што страните, особено Русија, не се подготвени на отстапки“, рече Лавров.
Тој оцени дека изјавите на Рубио покажуваат оти американскиот пристап кон решавањето на конфликтот суштински не се разликува од европскиот, додавајќи дека европските земји се обидуваат да го продолжат конфликтот во Украина за да задржат влијание во регионот.
Според Лавров, доколку Вашингтон навистина бил посветен на мировна иницијатива, воените дејствија одамна би биле запрени.
Рубио претходно изјави дека ниту Русија ниту Украина сè уште не се подготвени на неопходните отстапки за постигнување мировен договор, при што оцени дека руската страна покажува најмалку подготвеност за компромис.
