Рускиот министер за надворешни работи, Сергеј Лавров, изјави дека постојат обиди Белорусија да биде вовлечена во воениот конфликт во Украина, предупредувајќи дека тоа би можело дополнително да ги искомплицира напорите за политичко и дипломатско решение.
Говорејќи на 12. амбасадорска тркалезна маса на Дипломатската академија при Министерството за надворешни работи на Русија, Лавров оцени дека целта на ваквите активности е проширување на географијата на борбените дејствија.
„Очигледно е дека целта на овие потези е директно вовлекување на Белорусија во конфликтот и проширување на географијата на борбените дејствија, со што дополнително би се искомплицирале можностите за решавање на конфликтот со политички и дипломатски средства“, изјави Лавров.
Тој потсети на Договорот за безбедност меѓу Русија и Белорусија во рамките на Сојузната држава и нагласи дека Москва е подготвена да ги искористи сите механизми предвидени со договорот доколку тоа биде неопходно.
„Доколку биде потребно, подготвени сме да ги преземеме сите мерки предвидени со договорот за да ја обезбедиме безбедноста на нашиот сојузник и, секако, безбедноста на Сојузната држава“, порача рускиот министер.
Лавров воедно упати критики и кон Европската Унија, оценувајќи дека нејзиниот став во врска со преговорите за украинската криза претставува „целосна конфузија“.
Осврнувајќи се на украинскиот претседател Володимир Зеленски, Лавров изјави дека Киев поставува, како што рече, нереални услови за преговори, додавајќи дека Украина самостојно сака да одлучува кој ќе ја претставува Европа во евентуалните разговори.
„Тука коментарите се излишни“, рече Лавров, притоа употребувајќи навредливи квалификации на адреса на Зеленски.
