Рускиот министер за надворешни работи Сергеј Лавров ги обвини САД дека се одговорни за продолжувањето на војната во Украина за уште една година, тврдејќи дека Вашингтон се повлекол од наводните „договори од Енкориџ“, постигнати меѓу Доналд Трамп и Владимир Путин на нивниот самит на Алјаска.
Москва и понатаму се повикува на наводни договори од самитот во 2025 година, иако американски претставници претходно негираа дека такви договори воопшто постојат.
– Доколку Американците не се повлекоа од договорите од Енкориџ и Европа не ги извлечеше САД од нив, ќе живеевме без војна веќе една година, изјави Лавров.
Мировните напори во моментов се во застој, додека Русија останува на своите територијални барања, вклучително и барањето Украина да се повлече од Донбас. Специјалните пратеници на американскиот претседател Трамп, Стив Виткоф и Џаред Кушнер, овој месец ги посетија Москва и Киев, но без конкретен напредок. Лавров тврди дека Москва и натаму е подготвена за разговори.
Во меѓувреме, украинските сили започнаа офанзивна операција на северот на Доњецк, еден од четирите украински региони што Русија во 2022 година незаконски ги анектираше.
Бригадниот генерал Андриј Билецки, кој од минатиот месец командува со одбраната во Доњецк, изјави дека Третиот армиски корпус расчистил површина од 75 квадратни километри од руски инфилтрирани групи и освоил дополнителни 10 квадратни километри. Операцијата е наречена „Вивалди“.
Според Билецки, борбите се одвиваат северно од клучните упоришта Славјанск и Краматорск. Нивното заземање би ја приближило Русија до целта за воспоставување контрола врз целиот Донбас.
Иако руското напредување годинава е забавено, руските сили продолжуваат да се приближуваат кон Славјанск и Краматорск, а навлегуваат и подлабоко во источниот град Костјантиновка.
