Лавров: САД се директно вмешани во нападите врз Русија, Москва бара објаснување

Русија бара објаснување од САД за наводна вмешаност во украинските напади врз руска територија, изјави рускиот министер за надворешни работи Сергеј Лавров.

Лавров потврди дека Москва до американскиот Стејт департмент испратила низа прашања во врска со можната улога на Вашингтон во нападите, вклучително и во делот на разузнавачките информации.

— реклама —

Според него, Русија има информации дека САД се „многу подлабоко вклучени“ во организирањето и извршувањето на нападите длабоко на руска територија, за кои тврди дека биле насочени и кон цивилни цели. Од Вашингтон засега нема коментар за овие обвинувања.

— реклама —

И покрај обвинувањата кон САД, Лавров рече дека Москва нема да бара прекин на американската поддршка за Киев како предуслов за преговори.

„Не поставуваме ултиматуми“, изјави рускиот министер.

— реклама —

Лавров истовремено упати и нови остри пораки кон Украина, најавувајќи дека Русија ќе продолжи со напорите за уништување на она што, како што рече, од Западот ја поттикнува украинската воена машина.

Тој додаде дека за Москва е неприфатлив прекин на огнот долж линијата на фронтот и порача дека Русија нема намера да ја прекине војната.

Од друга страна, украинскиот претседател Володимир Зеленски изјави дека за Украина се одвива важен момент во војната. Според него, Русија повеќе нема предност на бојното поле, а главното оружје што му останува на рускиот претседател Владимир Путин се балистичките ракети.