Меѓународна криминална група која измамила граѓани за најмалку 220.000 евра преку лажни инвестиции во криптовалути е разбиена во акција спроведена со меѓународна полициска соработка, соопшти грчката полиција, објави Екатимерини.
Поднесени се обвиненија против осум странски државјани на возраст од 23 до 54 години, кои се товарат за учество во криминална организација, компјутерска измама, фалсификување и перење пари.
Акцијата била реализирана во соработка со Европол и други национални полициски служби.
Според истрагата, групата дејствувала од декември 2024 до август 2025 година, а жртви биле најмалку девет лица од Ламија, поширокиот регион на Атина, Солун, Серес и Кефалонија.
Осомничените телефонски контактирале граѓани, претставувајќи се како претставници на инвестициски фондови или банки, нудејќи им наводно профитабилни и сложени инвестициски шеми поврзани со криптовалути.
Откако жртвите ќе им дозволеле далечински пристап до своите компјутери, членовите на групата добивале контрола врз нивните банкарски сметки и ги празнеле средствата, соопшти полицијата.
