Унгарскиот хирург Жолт Дубоцки извршил исклучително ретка и ризична операција на отворено срце директно на улица во Будимпешта, спасувајќи го животот на 30-годишен маж кој бил тешко повреден со прободна рана во срцето.
Интервенцијата се случила по итен повик на спасувачките служби, при што медицинскиот тим на лице место затекнал пациент со тешко крварење и нестабилна состојба. Лекарите процениле дека транспортот до болница би бил премногу ризичен и би можел да го чини живот.
Дубоцки, кој покрај работата во Националниот онколошки институт во Будимпешта работи и во воздушната спасувачка служба, донел одлука веднаш да пристапи кон операција на терен. За околу седум минути тој го отворил градниот кош и извршил итна хируршка интервенција на срцето кое сè уште работело, со што ја стабилизирал состојбата на пациентот.
По зафатот, повредениот бил префрлен со хеликоптер во болница каде што продолжил со понатамошно лекување. Од институцијата истакнуваат дека брзата реакција и искуството на лекарот биле клучни за спасување на животот на пациентот.
