Младо момче синоќа брутално нападнало случаен минувач во центарот на Будимпешта, Унгарија. Нападот бил снимен, а на снимката не се гледа очигледна причина за инцидентот.
Мажот преминувал преку пешачки премин кога напаѓачот истрчал кон него, го фатил за врат и го соборил на улица. Додека се обидувал да стане, напаѓачот трипати го удрил со нога во главата.
Нападот го прекинал велосипедист, кој кон напаѓачот насочил предмет што личи на пиштол. Не е познато кој е тој човек ниту дали предметот бил вистинско огнено оружје.
Присутните потоа го опколиле напаѓачот, а на крајот го совладале обезбедувачи од близок угостителски објект. Возило на итната медицинска помош случајно минувало во близина, па лекарите веднаш му помогнале на повредениот. Неговата здравствена состојба засега не е позната.
Будимпештанската полиција потврдила дека осомничениот е уапсен и против него се води постапка поради обид за нанесување тешка телесна повреда. Неговиот идентитет и возраста не се објавени.
