Министерството за здравство соопшти дека лекот „Фостер“, кој се наоѓа на Позитивната листа на лекови, повторно ќе може да се подигнува од аптеките без доплата.
Како што информираат од Министерството, компанијата – носител на одобрението за ставање во промет на лекот ги известила дека се направени промени во интерес на пациентите кои го користат овој лек.
Почнувајќи од овој месец, осигурениците ќе можат да го подигнат „Фостер“ само со плаќање на законски утврдената партиципација за рецепт, без дополнителни трошоци.
Истото важи и за другите лекови што ги содржат истите активни компоненти и се користат во третманот на хроничната опструктивна белодробна болест (ХОББ).
Од Министерството за здравство посочуваат дека продолжуваат со активности насочени кон обезбедување поголема достапност на лековите за пациентите по поприфатливи цени.
