Целосна реорганизација на распределбата на предметите во Јавното обвинителство најави новиот државен јавен обвинител Ненад Савески, оценувајќи дека институцијата ја затекнал во состојба на сериозен организациски хаос и без јасна евиденција кој обвинител кои предмети ги води.
На брифинг со новинарите, Савески соопшти дека ќе ги повлече сите дадени овластувања за постапување по предмети, освен оние поврзани со Кочани, Ресен и Крива Паланка, со цел да воспостави ред и контрола во работата на обвинителите. Ова би значело дека предметите кои Ленче Ристовска ги водеше против ВМРО-ДПМНЕ и предметите за Онколигија кои Ана Гоговска ги застапуваше пред суд - ќе припаднат кај други обвинители. Веќе денеска, прераспределени се предметите за полицајците од „Пулс“ кои ги водеше Ивана Алексова Трајчева.
„Немам донесено одлука за иземање на Ристоска од конкретни предмети. Сепак, ќе ги повлечам сите овластувања во сите предмети, освен оние за Кочани, Ресен и Крива Паланка“, изјави државниот обвинител Ненад Савески.
Тој нагласи дека проблемот е системски и дека во институцијата недостасува основна организациска структура, при што овластувања биле доделувани од различни нивоа, а обвинители од едни обвинителства постапувале по предмети во други.
„Не може шеф на вишо обвинителство да застапува обвинение во друго. Па или шефувај, или оди на судења застапувај. Морам да знам кој што работи и еднаш засекогаш да се стави ред во Обвинителството“, рече Савески.
Тој додаде дека не постои прецизна евиденција за распределбата на предметите, што дополнително ја отежнува работата и контролата во системот.
Савески инсистираше дека одлуката е техничка и насочена кон функционалност на институцијата, а не политички мотивирана.
„Ако го почитувате мојот интегритет, моите одлуки не треба да ги нарекувате политички. Никогаш не сум бил член на политичка партија“, порача Савески.
Во однос на конкретни обвинители, тој нагласи дека нема да има фаворизирање и дека сите предмети ќе се третираат еднакво.
„Мене не ми е важно кој обвинител води одреден предмет, ниту кој е обвинет. За мене сите случаи се еднакви“, рече Савески.
Тој објасни дека одредени предмети нема да бидат опфатени со мерката поради кадровски и практични причини, посочувајќи дека во Ресен и Крива Паланка нема доволно обвинители, додека случајот за Кочани е комплексен и бара континуитет.
Савески информираше дека одлуката веќе е донесена и ќе биде доставена до сите обвинителства, по што ќе започне процесот на нова распределба на предметите и воспоставување системска контрола.
Во однос на смените кај поединечни предмети, меѓу кои и случајот поврзан со трагедијата во „Пулс“, тој појасни дека станува збор за законски и технички прашања, поврзани со истек на мандати и потребата да им се даде шанса и на други обвинители.
„Нема некакви обвинители. Сите се исти, секој ќе биде третиран на ист начин, сакам сите да почувствуваат дека ќе бидат вреднувани од Советот за јавни обвинители“, рече Савески.
Тој уверува дека промените нема да доведат до застој на постапките, нагласувајќи дека институцијата ќе продолжи да функционира без прекин.
„Не треба да има вознемиреност дека предметите за кои е сменет обвинителот ќе застанат“, изјави Савески.
Во однос на обвинувањата дека одредени предмети не се процесуираат, Савески одговори дека обвинителството постапува по закон и по основа на докази, а не по политички притисоци.
„Не ме интересира дали повикувањата доаѓаат од опозиција, позиција или премиер. Јавното обвинителство нема да постапува поради нив, туку по допрен глас, само ако утврди дека има основа“, порача државниот обвинител.
Тој се осврна и на јавните критики кон обвинителите, посочувајќи дека тие како носители на јавна функција мора да бидат подложни на јавен надзор, но дека интегритетот е лична одговорност.
„Интегритетот сите обвинители го носат во себе. Никој не може да им го загрози или да им го заштити“, рече Савески.
Случајот со предметите „Талир“, кои се однесуваат на перење пари и финансирање на партиски објект, останува во фокусот на јавноста, особено поради можните последици од нивна прераспределба и ризикот од пролонгирање на постапките.
