Полициски службеници од Мобилната единица за безбедност на сообраќајот при Министерството за внатрешни работи денеска во 18 часот лишиле од слобода 47-годишен возач од Тетово, кој на патот Гостивар–Тетово бил фатен како управува возило со брзина од 177 километри на час.
Како што соопшти МВР, прекршокот бил регистриран со специјално службено возило „пресретнувач“ на клучката Боговиње, каде што максимално дозволената брзина е 80 километри на час.
По насоки на јавен обвинител, возачот со иницијали К.Б. бил лишен од слобода. Тој управувал патничко возило „Шкода“ со тетовски регистарски ознаки, а против него ќе бидат преземени соодветни мерки и ќе одговара согласно со член 297-а од Кривичниот законик.
Од МВР најавуваат дека сообраќајните контроли ќе продолжат и во наредниот период на целата територија на државата, со цел санкционирање на прекршителите и зголемување на безбедноста во сообраќајот. Воедно, апелираат до сите учесници во сообраќајот да ги почитуваат сообраќајните правила и прописи.
