Левица: Пецаков ги остави охриѓани без пристап до своите домови - урбанистичката мафија на ДПМНЕ го окупира Охрид

Општинската организација на Левица во Охрид преку соопштение обвини дека повеќе од 50 семејства кои живеат во две станбени згради во строгиот центар на градот останале без единствениот пристап до своите домови, откако градоначалникот Кирил Пецаков издал одобрение за изградба на нова зграда на улицата што ги поврзува со нивните влезови.

— реклама —

Од партијата тврдат дека, иако со важечкиот урбанистички план со години биле предвидени алтернативни улици, Општина Охрид во изминатите пет години не презела активности за нивна изградба. Според Левица, наместо најпрво да се обезбеди пристап за жителите, на инвеститорот му било дозволено да започне со градежни работи, со што бил затворен единствениот постоечки пристап до двете згради.

— реклама —

Во соопштението се наведува дека жителите со години се обидувале институционално да го решат проблемот, но наместо решение добиле молк од институциите. Левица тврди и дека градоначалникот Пецаков им рекол дека „сами се виновни што купувале станови во тие згради“.

— реклама —

Партијата посочува и на, како што наведува, констатациите на Државниот завод за ревизија и на УНЕСКО дека охридскиот регион и натаму се соочува со бесправна урбанизација и недоволно спроведување на препораките за заштита на светското природно и културно наследство.

— реклама —

Левица обвинува дека локалната и централната власт не преземаат доволно мерки за справување со дивоградбите и оценува дека актуелните урбанистички политики се во корист на градежни интереси, а не на граѓаните.