Либан и Израел продолжуваат со преговорите, либанскиот претседател го поддржува договорот

Либанскиот претседател Џозеф Аун изјави дека го поддржува рамковниот договор со Израел, постигнат со посредство на Соединетите Американски Држави, оценувајќи дека тоа е најдобрата можна опција и дека веќе дава конкретни резултати.

Неговата изјава доаѓа во момент кога во Рим се одржува нова рунда директни преговори меѓу Либан и Израел.

— реклама —

За време на средбата со претставници на Православното собрание, Аун порача дека Либан нема да отстапи кога станува збор за своите национални права.

„Нашите цели се јасни и нема да попуштиме кога станува збор за правата на Либан“, рече тој, додавајќи дека несогласувањата се легитимни, но дека конфликтите не се решение.

— реклама —

Тој нагласи дека дијалогот меѓу Либанците треба да биде во интерес на државата, а не на поединци.

„Омразата не гради држава и институции, туку ги уништува. Патот не е лесен, но постои голема надеж дека ќе постигнеме резултати што ќе стават крај на крвопролевањето“, изјави Аун.

— реклама —

По средбата, генералниот секретар на Православното собрание и поранешен пратеник Марван Абу Фадел изрази поддршка за ставовите на претседателот, нагласувајќи дека единството и поддршката на државните институции се клучни за стабилноста на земјата.

Во меѓувреме, во Рим продолжува шестата рунда директни преговори меѓу Либан и Израел. Претходните пет рунди беа одржани во Вашингтон и резултираа со постигнување рамковен договор.

Според договорот, предвидено е постепено повлекување на израелските сили од окупираните делови на јужен Либан, почнувајќи од две пилот-зони. Повлекувањето ќе зависи од тоа дали либанската армија ќе ја преземе безбедносната контрола врз тие подрачја и дали ќе бидат разоружани нерегуларните вооружени групи, меѓу кои и Хезболах.

Преговорите се одвиваат додека Израел продолжува со воените операции во Либан. Според либанските власти, од 2 март досега во израелските напади загинале најмалку 4.324 лица, повеќе од 12.000 се повредени, а над еден милион жители биле принудени да ги напуштат своите домови.