Либан денеска во Вашингтон започнува нова рунда директни преговори со Израел, во обид да се постигне трајно прекинување на конфликтот што трае од март годинава. И покрај дипломатските напори, либанските власти признаваат дека шансите за значителен напредок се ограничени.
Според либански претставници, директните разговори со Израел се единствениот начин да се обезбеди крај на воените дејствија, кои започнаа откако Хезболах на 2 март изврши напади врз Израел во знак на поддршка за Иран, по што следуваа израелски воздушни и копнени операции во Либан.
Досегашните четири рунди преговори, кои започнаа во април, не донесоа трајно примирје. Сепак, последните денови беа обележани со најдолгиот период на затишје, откако САД и Иран постигнаа меморандум за разбирање со кој е предвидено прекинување на борбите на повеќе фронтови, вклучително и во Либан.
Либанските власти изразуваат загриженост дека договорот меѓу Вашингтон и Техеран дополнително ја ослабнал позицијата на Бејрут, бидејќи Иран, според нив, не може да преговара во име на Либан.
Една од главните цели на либанската делегација во разговорите ќе биде обезбедување временска рамка за повлекување на израелските сили од јужен Либан. Од друга страна, израелските претставници најавуваат дека војската ќе остане на терен сè додека не се исполнат безбедносните услови.
Израелските власти истакнуваат дека главната цел на разговорите е разоружувањето на Хезболах и постигнувањето долгорочен мировен договор со Либан.
Хезболах, пак, категорично го отфрла секое разоружување и ја повикува либанската влада да се повлече од директните преговори со Израел.
Разговорите во Вашингтон се очекува да траат три дена.
