Адвокатот Владимир Туфегџиќ смета дека денеска презентираните докази на судењето за трагедијата во дискотеката „Пулс“ во Кочани отвораат сериозни прашања за дел од обвинението и за теоријата на обвинителството за институционална одговорност.
Според него, обвинителството презентирало лиценца издадена во 2012 година со важност од една година, која се однесувала на сосема друг објект и друга локација, а не на објектот во кој во 2025 година се случи трагедијата во која загинаа 62 лица - „Пулс“. Со оваа лиценца, Обвинителството сака да докаже вина кај ексминистерот за економија, Ваљон Сарачини.
„Ако денеска на судењето во предметот ‘Пулс’ обвинителството презентираше доказ, издадена лиценца во 2012 година со важност од една година, за сосема друг објект на друга локација, кој нема никаква врска со предметниот објект каде што се случила ужасната трагедија, основано се поставува прашањето за основаноста на теоријата на случај за ‘верижната’ институционална одговорност и поврзаност на министри од 2012 година со трагедија во 2025 година“, напиша Туфегџиќ.
Тој оценува дека токму денешните докази на обвинителството треба да бидат повод за преиспитување на дел од обвинението.
„Денешните докази на обвинителството треба да бидат основа за ревидирање на дел од обвинението и ова се наметнува како нужна потреба токму заради утврдувањето на вистината, степенот на вина и одговорноста“, додава адвокатот.
Судењето за трагедијата во „Пулс“ продолжува со изведување на доказите предложени од обвинителството.
