Личната карта и возачката дозвола на мобилните телефони – апликацијата „м.Услуги“ пристигнува

Граѓаните ќе добијат полесен пристап до електронски јавни услуги и дигитални документи преку мобилен телефон со новата апликација „м.Услуги“, која денеска ќе ја промовира Министерството за дигитална трансформација во Македонската филхармонија во Скопје.

— реклама —

На настанот ќе се обратат премиерот Христијан Мицкоски, министерот за дигитална трансформација Стефан Андоновски и амбасадорот на Европската Унија во Македонија, Михалис Рокас.

— реклама —

Андоновски најави дека апликацијата ќе биде бесплатна и незадолжителна, а преку неа граѓаните ќе можат да пристапат до електронски верзии на личната карта и возачката дозвола, како и до првите три дигитални услуги. Апликацијата ќе може да се преземе преку Google Play и App Store.

— реклама —

„Ова ќе биде наш прв чекор кон дигиталниот паричник. Апликацијата е бесплатна за преземање и не е задолжителна, но ќе нуди многу нови погодности. Ќе го свртиме фокусот кон тоа државата да биде достапна на мобилен телефон, односно на дланка“, изјави Андоновски.

Во следната фаза се планира додавање податоци од системот „М.здравје“ и од европската младинска картичка, со цел апликацијата постепено да прерасне во дигитален паричник што ќе обединува повеќе документи и јавни услуги. Прифаќањето на електронските документи од институциите ќе се воведува постепено, со усогласување на прописите и зајакнување на институционалните капацитети.