Македонскиот спорт испиша нова страница во својата историја. Лина Ѓорческа стана првата македонска тенисерка, но и првиот македонски тенисер воопшто, која обезбеди пласман на главниот турнир на Вимблдон, најпрестижниот Гранд слем во светот.
По големиот успех, најдобрата македонска тенисерка не ги криеше емоциите и во изјава за телевизијата на Вимблдон истакна дека за неа ова е исполнување на животниот сон.
„Горда и среќна сум за сите овие денови на Вимблдон. Доаѓам од мала земја и горда сум што сум единствената во историјата, и во машка и во женска конкуренција, која се избори за место на главниот турнир. Ова за мене е остварување на сонот. Тоа што доаѓам од мала држава не е лесно, околу комплетната логистика, тренинзите, условите, секако и парите. Но, кога си тука даваш 100 проценти за да успееш, па на крајот сето тоа носи резултат. Можеби доаѓам од мала земја, но секако имаме огромно спортско срце“, изјави Ѓорческа.
Ждрепката за главниот турнир на Вимблдон ќе се одржи во петок од 11 часот, кога Ѓорческа ќе ја дознае својата противничка во првото коло.
Со овој историски пласман, Лина Ѓорческа го запиша своето име со златни букви во историјата на македонскиот тенис.
