Литванскиот претседател Гитанас Науседа изјави дека разузнавачките служби располагаат со информации за можни руски провокации насочени кон Полска или балтичките земји, кои би можеле да бидат искористени за тестирање на единството на НАТО.
Во интервју за агенцијата БНС, Науседа рече дека станува збор за можни ограничени напади врз објекти од критичната инфраструктура, како што се енергетските и транспортните системи.
„Не можам да негирам дека имаме такви информации и дека станува збор за насочени операции кои многу веројатно би можеле да бидат насочени кон критичната инфраструктура“, изјави литванскиот претседател.
Тој додаде дека, врз основа на овие проценки, Литванија ги засилила безбедносните мерки за заштита на клучните објекти, особено оние што се важни за функционирањето на енергетскиот систем и поврзувањето на земјата со европската енергетска мрежа.
Според Науседа, потенцијалните руски активности би можеле да вклучуваат саботажи, физички оштетувања на инфраструктурата или напади со беспилотни летала.
„Сè што може да го наруши функционирањето на овие објекти мора да се сфати сериозно“, нагласи тој.
Осврнувајќи се на војната во Украина, Науседа оцени дека ситуацијата во Кремљ се влошува и дека Русија станува сè поопасна поради растечкиот притисок од последиците од војната и украинските напади врз руската инфраструктура.
„Кремљ станува исклучително опасен бидејќи, од очај, почнува да размислува за потези што претходно не ги разгледуваше“, изјави литванскиот претседател.
Тој порача дека Литванија не смее да смета дека ризиците ќе се намалат сами по себе, туку мора да биде подготвена да одговори на сите можни закани.
