Лукашенко ги обвини Полска и Балтикот дека шират страв од војна за да добијат пари од ЕУ

Претседателот на Белорусија, Александар Лукашенко, ги обвини Полска и балтичките земји дека шират гласини за наводни планови на Белорусија да ги нападне, тврдејќи дека тоа го прават за да добијат дополнителни финансиски средства.

„Ним им се потребни пари. Ниту трите балтички држави, поранешни републики на Советскиот Сојуз, ниту Полска немаат доволно моќ да ги задоволат своите потреби, особено во воената сфера“, изјави Лукашенко за време на состанокот со претставници на безбедносните структури во Минск, пренесе агенцијата Белта.

— реклама —

Зборувајќи за проверките на борбената готовност на белоруските вооружени сили, Лукашенко ги отфрли тврдењата дека тие претставуваат подготовка за војна.

„Немаме намера никого да напаѓаме, и покрај тоа што нашите западни ‘пријатели’ во последно време започнаа медиумска кампања, тврдејќи дека Русија ќе ги нападне балтичките земји, а можеби и Полска, од територијата на Белорусија и заедно со Белорусија“, изјави тој.

— реклама —

Лукашенко ги отфрли и обвинувањата дека Белорусија е поврзана со наводното преминување на вооружена група на територијата на Летонија.

— реклама —

Според него, овие тврдења служат за Летонија да добие пари од Европската Унија.

„Многу добро знаеме, а за тоа веќе сум и информиран, дека сето ова е направено за Летонија да добие пари од Европската Унија. Немаме никаква врска со гласините дека сме влегле на нивна територија и дека сме заробиле некого или сме испратиле група мигранти. Тоа се глупости“, порача белорускиот претседател.

Претходно, летонскиот министер за внатрешни работи, Јанис Домбрава, соопшти дека на 6 октомври група непознати, маскирани и вооружени лица ја преминале границата меѓу Летонија и Белорусија.

Според неговите зборови, групата оштетила делови од граничната инфраструктура и украла камери за видеонадзор, по што се вратила на територијата на Белорусија пред пристигнувањето на летонската гранична патрола.