Унгарскиот премиер Петер Маѓар соопшти дека четворица министри во новата влада добиле право на вето при носење владини одлуки, наведувајќи дека причината е сложеноста на реформите и задачите што ја очекуваат земјата.
Според Маѓар, министрите за здравство, правда, образование и финансии ќе имаат можност да стават вето на одлуки на владата поради, како што рече, „особено сложениот политички циклус“ и потребата од спроведување на промени и реформи.
Новата влада официјално положи заклетва во унгарскиот парламент, со што и формално беше конституирана извршната власт.
Претходно, унгарскиот претседател Тамаш Шујок на церемонија во Будимпешта официјално ги именуваше министрите во владата на предлог на Маѓар.
Претседателката на парламентот Агнеш Форштофер потоа објави дека со именувањето на министрите, владата на Унгарија е и официјално формирана.
