Новата унгарска влада, предводена од премиерот Петер Маѓар, започна со демонтирање на политичкиот систем што го воспостави Виктор Орбан, откако парламентот усвои обемни уставни измени со двотретинско мнозинство.
Измените следуваат само два месеца по преземањето на власта од страна на партијата Тиса, која на изборите освои убедливо мнозинство, овозможувајќи ѝ брзо да ги спроведе најавените реформи.
Со уставните измени предвреме престануваат мандатите на повеќе високи функционери именувани за време на владеењето на Орбан, меѓу кои и претседателот Тамаш Шуљок, како и четворица судии на Уставниот суд.
Истовремено, се враќаат дел од надлежностите на Уставниот суд, се зајакнува независноста на судството, се намалува бројот на закони што можат да се менуваат само со двотретинско мнозинство и се формира тело за враќање на незаконски стекнатиот имот. Новите правила предвидуваат и ограничување на пратеничките мандати на најмногу три последователни мандати.
Премиерот Петер Маѓар изјави дека промените се неопходни за обновување на демократските институции, оценувајќи дека досегашниот устав бил приспособен на интересите на поранешната власт.
Од друга страна, Фидес и коалицискиот партнер КДНП ја бојкотираа парламентарната седница и тврдат дека измените претставуваат напад врз демократијата и владеењето на правото.
Претседателот Тамаш Шуљок, кој го потпиша уставниот амандман со кој му завршува мандатот, изјави дека немал законска можност да постапи поинаку, но предупреди дека ваквите измени создаваат опасен преседан и можат да му наштетат на владеењето на правото.
Маѓар најави дека сегашните измени се само преодно решение и дека од есен ќе започне широка јавна расправа за изработка на целосно нов устав на Унгарија.
