Унгарскиот премиер Петер Маѓар го критикуваше претседателот на државата Тамаш Шуљок, обвинувајќи го дека на официјално патување во Соединетите Американски Држави го повел и својот син Мартон, при што трошоците биле покриени со средства на даночните обврзници.
Во објава на Фејсбук, Маѓар го доведе во прашање оправданоста на тоа што синот на претседателот патувал со воениот авион „Фалкон“ на унгарските вооружени сили иако, како што тврди, официјално не бил дел од претседателската делегација.
Според него, дванаесетдневната посета на САД чинела неколку стотици милиони форинти, при што претседателот се сретнал со припадници на унгарската заедница и присуствувал на настани по повод националниот празник 15 март, но не остварил официјални средби со претставници на американската администрација или со членови на Конгресот.
Маѓар наведе дека воениот авион летал до Њујорк, Кливленд, Њу Орлеанс, Хјустон и Далас.
Во својата објава тој иронично посочи дека претседателот, заедно со сопругата и синот, го посетил и ранчот „Саутфорк“, познат како домот на семејството Јуинг од телевизиската серија „Далас“, додавајќи дека се надева оти уживале во посетата.
Во друга објава, Маѓар тврдеше дека претседателот Шуљок во јануари отпатувал и во Обединетото Кралство со приватен авион, исто така на товар на даночните обврзници, при што два дена престојувал во градот каде што живее неговата ќерка.
