„Македонија ги исполнува обврските – време е Европа да обезбеди фер процес без нови условувања“, порача Мицкоски на средбата со фон дер Лајен

Премиерот Христијан Мицкоски на средбата со претседателката на Европската комисија, Урсула фон дер Лајен, порача дека Македонија останува посветена на европската интеграција, но очекува пристапниот процес да биде фер, предвидлив и без нови билатерални условувања.

Мицкоски ја оцени посетата на фон дер Лајен како важна во период кога се разговара за иднината на европското проширување. Тој посочи дека на средбата биле отворени прашањата за реформите, динамиката на пристапниот процес и предизвиците што со години го оптоваруваат патот кон Европската Унија.

„Нашата определба како држава е јасна и останува непроменета. Сакаме да бидеме дел од Европската Унија и посветено работиме на таа цел“, рече Мицкоски.

— реклама —

Според премиерот, Македонија ги спроведува реформите и ги исполнува обврските што се очекуваат од земја која сака да стане членка на Унијата. Тој додаде дека понекогаш реформите се завршуваат со задоцнување, но дека процесот продолжува.

Во однос на прашањата со источниот сосед, Мицкоски порача дека Македонија сака тие да се надминат преку дијалог, добра волја и заемно почитување. Во тој процес, како што рече, очекува и поголема вклученост на Европската Унија.

— реклама —

„Не бараме од Унијата да заземе страна, бараме да помогне во создавање услови за одржливо европско решение во кое договореното ќе биде јасно, обврските ќе важат за сите, а процесот на пристапување нема повторно да биде отворен за нови билатерални условувања“, порача Мицкоски.

Тој нагласи дека секое решение треба да создаде сигурност дека со неговото исполнување се затвора една фаза и се отвора патот кон следната, без дополнителни барања и нови толкувања.

Мицкоски зборуваше и за реформите што се спроведуваат во земјата, посочувајќи ги владеењето на правото, јавната администрација, подобрувањето на деловната клима, дигитализацијата и реформите во образованието.

— реклама —

Тој го истакна и Планот за раст, наведувајќи дека реформската агенда веќе создава резултати и дека позитивната оценка на Европската комисија за спроведените реформи овозможила натамошно користење средства од Планот за раст.

Според Мицкоски, европската интеграција треба да биде почувствувана од граѓаните и пред формалното членство, преку поголем пристап до единствениот европски пазар, економски можности, подобра инфраструктурна поврзаност, инвестиции и можности за младите.

Како пример го посочи Коридорот VIII, кој, според него, покажува како европската интеграција може да се претвори во конкретна поврзаност преку патишта, железници и трговија.

„Нашата амбиција е јасна: додека разговараме за членството, дома да изградиме држава која според своите институции, стандарди и економски можности веќе функционира како европска држава“, рече Мицкоски.

Тој ја оцени средбата со фон дер Лајен како чекор кон поголема доверба, поотворен дијалог и поконкретна соработка со Европската Унија, додавајќи дека Македонија очекува процесот да се движи напред и да создава конкретни резултати.