Македонија предупреди на институционална реакција по изјавите од бугарскиот амбасадор Радуков за случајот со Ива Михаилова

Министерството за надворешни работи и надворешна трговија изрази незадоволство до бугарската амбасада поради неодамнешни изјави на бугарски претставници, оценувајќи ги како навредливи и провокативни, како и како мешање во внатрешните работи на државата.

— реклама —

Од Министерството информираат дека денеска бил повикан претставник на Амбасадата на Бугарија, кој, во отсуство на амбасадорот, ја извршува функцијата вршител на работи. На средбата било изразено незадоволство од изјавата на министерот за внатрешни работи на Бугарија, Иван Демерџиев, во врска со случајот со Ива Михаилова.

— реклама —

Реакција била упатена и за изјавата на бугарскиот амбасадор Желјазко Радуков за телевизијата БТВ, која македонската страна ја оценила како директно мешање во внатрешните работи, поради квалификациите за работата на надлежните институции.

— реклама —

Од Министерството посочиле дека ваквите провокации го оддалечуваат билатералниот дијалог од принципите на добрососедство, меѓусебно почитување, воздржаност и конструктивна комуникација. Притоа било предупредено дека ваквото однесување може да наметне потреба од соодветна институционална реакција, согласно Виенската конвенција за дипломатски односи, која ги уредува рамките на дипломатското дејствување и принципот на немешање во внатрешните работи на државата домаќин.

На средбата била потврдена посветеноста на Македонија на развојот на добрососедските односи, засновани на доверба, меѓусебно почитување и европски принципи, при што одговорност и посветеност биле побарани и од бугарската страна.