По неколку години пауза, Македонија повторно ќе биде дел од Евровизија, потврди директорот на Македонска радио телевизија, Зоран Ристоски.
На јавна седница на Програмскиот совет на МРТ, Ристоски соопштил дека по средбите со претставници на Европски радиодифузен сојуз може со сигурност да каже дека Македонија ќе испрати свој претставник на музичкиот фестивал во 2027 година, кој ќе се одржи во Софија.
Тој истакнал дека МРТ има поддршка од Европскиот радиодифузен сојуз за промоција на македонските културни вредности и очекува јавниот сервис да добие поповолен пакет за враќање на натпреварот.
Ристоски додал дека завршува времето на нетранспарентен избор на учесници, посочувајќи го јавниот оглас за избор на композиција за Јуниорски Евросонг 2026 како пример за новиот пристап.
Македонија последен пат настапи на Евровизија во 2022 година, кога земјата ја претставуваше Андреа Коевска со песната Circles.
Најдобриот пласман за Македонија го оствари Тамара Тодевска со песната Proud, освојувајќи го седмото место во 2019 година.
