„Македонија веќе презема значаен дел од одговорноста за европската безбедност, нашиот придонес треба да биде соодветно препознаен“, вели Тошковски

Македонија веќе презема значителен дел од одговорноста за европската безбедност и нејзиниот придонес треба соодветно да биде препознаен, порача министерот за внатрешни работи Панче Тошковски на Министерскиот форум ЕУ – Западен Балкан за правда и внатрешни работи, што на 5 и 6 ноември се одржа во Будва, Црна Гора.

На форумот, на кој присуствуваа министри од регионот и претставници на европските институции, Тошковски говореше за миграцијата, граничната безбедност и борбата против криминалот во дигиталната ера.

— реклама —

Тој посочи дека во првите десет месеци од 2026 година обидите за нелегален премин на државната граница се зголемиле за 29 проценти во споредба со истиот период лани. Во овој период биле откриени 23 случаи на криумчарење на вкупно 144 мигранти, а кривично биле гонети 38 лица.

Тошковски ја истакна соработката со Фронтекс, чија заедничка операција со македонската полиција, започната на јужната граница во 2023 година, во август годинава била проширена и на северната. Во завршна фаза се и подготовките за нејзино проширување на западната граница. Тој побара и натамошна техничка, кадровска и финансиска поддршка од Европската Унија.

— реклама —

Министерот информираше дека Македонија има речиси целосна усогласеност со европската листа на држави чии државјани подлежат на визен режим.

— реклама —

Осврнувајќи се на криминалот во дигиталниот простор, Тошковски предупреди на растот на сајберкриминалот, онлајн измамите и злоупотребата на криптовалутите и вештачката интелигенција за криминални цели. Како значаен чекор го посочи формирањето специјализирано одделение во МВР за истраги на злоупотреби на деца на интернет и истраги од отворени извори, со надлежност на национално ниво.

Тој повика на побрза размена на информации и електронски докази меѓу земјите од регионот и европските институции, како и на поголеми вложувања во дигиталната форензика и современите аналитички алатки.

— реклама —

На маргините на форумот, Тошковски остварил и средба со извршната директорка на Агенцијата на Европската Унија за азил, Нина Грегори. Разговарале за продлабочување на соработката, усогласување со европските стандарди за азил и меѓународна заштита, како и за јакнење на институционалните капацитети.

Тошковски порача дека заедничкиот успех треба да се мери преку заштитени жртви, успешни истраги, разбиени криминални мрежи и одземени незаконски стекнати средства.