ТОШКОВСКИ

(Видео) „Ќе ги изгориме! Ќе останат и без мотори и без можноста да глумат моторџии“, рече Тошковски за тие кои лудуваат на едно тркало

Министерот за внатрешни работи Панче Тошковски најави засилени контроли и строги мерки против моторџии кои, како што рече, дивеат низ градовите и не ги почитуваат сообраќајните правила.Тој направи разлика меѓу, како што ги нарече, „вистински моторџии“ и оние кои „глумат моторџии“.„Тие кои се вистински моторџии, тие во град не ги прекршуваат сообраќајните правила. Тие се посветени за почитување на сообраќајни правила особено во град, бидејќи ги знаат последиците кога не ги почитуваат, тие се на две тркала“, рече Тошковски.Според него, проблем се оние кои возат без кацига, со голема брзина и прават опасни маневри.„Ова не се однесува на тие кои возат со кацига, со соодветна брзина... А најавувам за тие кои глумат дека се моторџии, односно возат мотор без кацига, со далеку поголема брзина, возат на црвена, го дигаат на едно тркало, и мислат дека ‘Сејф сити’ не ги детектира, МВР ќе биде фокусирано на нив, особено во градските средини“, кажа министерот.Тој порача дека ваквите возачи ќе бидат главен таргет на полицијата во наредниот период.„Слободно можам да кажам дека ќе ги изгориме! Ќе останат и без мотори и без можноста да глумат дека се моторџии“, изјави Тошковски.Министерот додаде дека ваквите возачи претставуваат сериозен ризик за безбедноста.„Тие ќе бидат таргет, тие што употребуваат мотори надвор од закон. Затоа што тие се најголем ризик да отепаат некого“, рече Тошковски.На крајот, тој упати пофалби до моторџиите кои ги почитуваат правилата.„Не за вистинските моторџии, за нив секоја чест и поздрав“, додаде министерот.

Македонија | пред 17 часа

Лажните казни за „Сејф сити“ доаѓаат од странски броеви, не е ништо ново во светот, вели Тошковски

Министерот за внатрешни работи Панче Тошковски вели дека бројните фишинг пораки за наводни казни од системот „Сејф сити“ се испраќаат од странски броеви и дека граѓаните лесно можат да ги препознаат.„Сите фишинг напади се од странски броеви. Лесно се препознава“, рече Тошковски.Тој посочи дека официјалните пораки од МВР имаат препознатлива ознака.„На официјалниот број на МВР има официјална кратенка и се препознава“, кажа министерот.Според информациите што ги добил од Секторот за информатика, ваквите измами не можат да бидат испратени од домашни броеви.„Согласно информациите кои ги имам од Секторот за информатика, сите се од странски броеви и од домашен број не може да биде сторен фишинг напад“, изјави Тошковски.Тој додаде дека вакви измами постојат насекаде во светот и дека измамниците ја користат секоја нова форма на комуникација со граѓаните.„Лажни напади има секаде во свет. Тие кои ги вршат нападите, гледаат поле за измама при секоја комуникација на граѓаните“, рече министерот.Според него, новината е што „Сејф сити“ воведува помодерен начин на известување, наместо старите хартиени пратки.„Ново е за нас поврзано со оваа услуга, бидејќи ја нудиме на попаметен начин, за разлика од претходно со пратки“, додаде Тошковски.

Македонија | пред 17 часа

Уште еден нов прекршок ќе казнува „Сејф сити“, а засега бројни се казните и за погрешно престројување

Министерот за внатрешни работи Панче Тошковски најави проширување на системот „Сејф сити“, посочувајќи дека освен брзо возење, преку системот ќе се констатираат и други сообраќајни прекршоци.„И сега констатираме поголем број на прекршоци. Не е само брзо возење, туку и погрешно престројување, погрешно свртување, поминување на црвено светло“, рече Тошковски.Тој додаде дека системот може дополнително да се унапреди со зголемување на бројот на прекршоци кои автоматски ќе се детектираат.Според министерот, една од првите следни фази ќе биде санкционирањето на погрешното паркирање.„Во делот на погрешно паркирање, тоа ќе е една од првите фази кои ќе бидат имплементирани“, кажа Тошковски.Тој објасни дека во процесот ќе бидат вклучени повеќе институции и дека МВР сака внимателно да пристапи кон имплементацијата за да нема неправилности во казнувањето.„Тука ќе бидат вклучени повеќе институции, бидејќи е многуброен прекршок, не сакаме, при нецелосно утврдени правила на игра, да имаме казнување на граѓаните. Затоа сме внимателни во овој дел“, изјави министерот.Како прв таргет за имплементација на системот ги посочи главните сообраќајници во Скопје.„Прв таргет за имплементирање, односно детектирање, ќе бидат главните крвотоци во градот Скопје, односно булеварите“, рече Тошковски.

Македонија | пред 17 часа

„Беше морбидно, но тоа беше и целта“ – Тошковски за кампањата со телефонскиот број низ скопските билборди

Министерот за внатрешни работи Панче Тошковски изјави дека контроверзната кампања со билбордите низ Скопје, на кои имаше телефонски број што не одговараше на повиците, ја постигнала својата цел.Кампањата беше спроведена под слоганот „Како звучи неодговорно возење?“, а граѓаните кои се јавуваа на бројот не добиваа никаков одговор.„Беше специфично и морбидно она што го спроведовме, но тоа беше и целта“, рече Тошковски.Тој објасни дека идејата била граѓаните директно да почувствуваат дел од реалноста со која секојдневно се соочуваат полицајците и лекарите по тешки сообраќајни несреќи.„Она што за полицајците и докторите е секојдневие по сообраќајна незгода во Македонија, да биде момент кој ќе допре до секој граѓанин кој ќе се јави на овој број а нема да добие повратен одговор“, изјави министерот.Според него, кампањата веќе дала резултати и ќе следува и втора фаза.„Кампањата ја оствари целта во првата фаза. Ќе има и втора фаза“, кажа Тошковски.Министерот посочи и статистика за намалување на бројот на жртви во сообраќајни несреќи.„Во 2025 година имаме 47 жртви во првите четири месеци. Со кревање на овие прашања во јавноста, со водење на вакви кампањи, со активна имплементација на ‘Сејф сити’, се даде соодветен инпут за првите четири месеци оваа година да имаме 26 жртви“, рече Тошковски.Тој додаде дека во Скопје, заклучно со април 2026 година, нема жртви во сообраќајни несреќи.„Во Скопје, до април 2026 година, немаме жртви“, изјави Тошковски.

Македонија | пред 17 часа

„Хероите живеат вечно“, Тошковски им оддаде почит на загинатите полицајци во „Диво Насеље“

Денеска се навршуваат 11 години од вооружената престрелка во кумановската населба „Диво насеље“. Во дводневната престрелка на 9 и 10 мај 2015 година, животот го изгубија осум полицајци, припадници на специјалната единица „Тигар“, а беа убиени и 14 припадници на косовската група и ранети најмалку 40 лица.Министерот за внатрешни работи, Панче Тошковски, положи свежо цвеќе на споменикот на загинатите полициски службеници во кругот на СВР Куманово.„Со длабока почит и неизмерна благодарност се сеќаваме на осумтемина македонски херои кои пред 11 години ги положија своите животи во терористичката акција во кумановско „Диво Насеље“ – Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимоски и Горан Стојменовиќ.Имав чест да положам свежо цвеќе на споменикот на загинатите полициски службеници во кругот на СВР Куманово, а потоа да присуствувам и на меморијалниот турнир во мал фудбал „Хероите живеат вечно“, во чест на нивната жртва, храброст и љубов кон татковината.Тие беа храбри припадници на македонската полиција кои во најтешките моменти застанаа во одбрана на државата, безбедноста и мирот на граѓаните. Нивната жртва останува врежана во колективната меморија на македонските граѓани како симбол на чест, достоинство и непоколеблива храброст.Нашата обврска е никогаш да не ги заборавиме и достоинствено да го чуваме споменот за нив. Македонија вечно ќе им биде благодарна.Хероите живеат вечно!Нека им е вечна слава!“, напиша Тошковски.На социјалните мрежи објави имаа и поранешниот министер за внатрешни работи Оливер Спасовски, поранешен заменик-министер за внатрешни работи Митко Бојмацалиев, како и полицискиот синдикат.„На 9 мај 2015 година, Куманово се разбуди со звукот на експлозии, пукотници и вознемирени гласови, кои ги пробудија граѓаните.Диво Насеље беше во пламен, а Македонија се соочи со еден од најтешките безбедносни предизвици во поновата историја.Во тие тешки часови, најскапоценото — својот живот — го дадоа најхрабрите синови на Македонија. Во директен судир со вооружена терористичка група, во одбрана на државата, паднаа припадници на специјалните единици на македонската полиција.Нивната храброст, саможртва и верност кон татковината никогаш нема да бидат заборавени.Жарко КузмановскиНенад СерафимовскиСашо СамојловскиБобан ИвановиќГоран ИлијевскиИсамедин ОсманиЉубиша АранѓеловиќГоран СтојменовиќНека им е вечна слава“, напиша Оливер Спасовски.„Утрото на 9 мај 2015 година, ние кумановци се разбудивме со звуци од бомби, пукотници и растревожени лелеци од сограѓаните…Диво насеље гореше и забрзо се прошири веста за загинатите припадници на македонската полиција, во вооружен судир со терористичка групација.Најскапоценото, својот живот во одбрана на Македонија, го дадоа припадниците на специјалните единици на македонската полиција.Жарко КузмановскиНенад СерафимовскиСашо СамојловскиБобан ИвановиќГоран ИлијевскиИсамедин ОсманиЉубиша АранѓеловиќГоран СтојменовиќНека им е вечна слава“, напиша Митко Бојмацалиев, поранешен заменик-министер за внатрешни работи.„На денешен ден "9-ти" мај 2015 година, во антитерористичката акција на Македонската полиција во месноста "ДИВО НАСЕЉЕ" - Куманово, осуммина македонски херои го положија својот живот во одбрана на татковината.Како Синдикат изразуваме ПРЕГОЛЕМА ЖАЛ за трагично загинатите наши колеги. Тие СЕ ВЕЌЕ НАШИ ХЕРОИ И НИКОГАШ НЕМА ДА БИДАТ ЗАБОРАВЕНИ.Претседателот на СО на СПМ Прилеп, Љупчо Маркоски, во нивна чест денес положи цвеќе пред споменикот на Ненад Серафимовски во Прилеп.Слава и почит за хероите на МАКЕДОНИЈА.Нивниот хероизам е наш патоказ за тоа како се сака, почитува и брани татковината Македонија."Кој се плаши дека ќе страда, веќе страда затоа што се плаши".Загинаа за одбрана на суверенитетот и територијалниот интегритет на Република Македонија.Овој датум и овие херои вечно ќе останат запишани во најновата македонска историја: Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимовски и Горан Стојменовиќ. ВЕЧНА ИМ СЛАВАХероите никогаш не умираат, НИКОГАШ НЕМА ДА ВЕ ЗАБОРАВИМЕ“, напишаа од полицискиот синдикат.

Македонија | пред 6 дена

Тошковски за денот на македонската полиција: Модернизација, реформи и бескомпромисна борба против криминалот, градиме модерна и професионална европска полиција

Во кругот на Министерството за внатрешни работи денеска се одржа централната свеченост по повод 7 Мај – Денот на македонската полиција, на која се обратија министерот за внатрешни работи Панче Тошковски и директорот на Бирото за јавна безбедност Александар Јанев.Во своето обраќање, министерот Тошковски истакна дека македонската полиција останува еден од клучните столбови на безбедноста, стабилноста и владеењето на правото, нагласувајќи дека институциите имаат капацитет за одлучна борба против криминалот и корупцијата.Тој посочи дека во изминатиот период е забележано намалување на вкупниот криминалитет за повеќе од шест проценти, при што биле разбиени 16 организирани криминални групи со 205 инволвирани лица. Според него, реализирани се и значајни постапки во областа на корупцијата, вклучително и случаи од висок профил, а сузбиени се и четири криминални групи.„Вкупниот криминалитет е на најниско ниво во последните 20 години, додека ефикасноста изнесува 67,2 проценти, што претставува највисоко ниво во истиот период“, истакна Тошковски.Тој додаде дека паралелно со безбедносните активности се спроведува и процес на модернизација на институцијата, како и подобрување на услугите кон граѓаните. Во таа насока, како што рече, се реновирани управните служби во Скопје, отворени се осум нови управни канцеларии низ државата, а по повеќе од 15 години набавени се 120 нови службени возила со современа технолошка опрема.Директорот на Бирото за јавна безбедност Александар Јанев нагласи дека полицијата останува гарант на безбедноста и довербата на граѓаните, при што професионалноста и интегритетот се темелите на институцијата.„Водиме системска и бескомпромисна борба против криминалните групи во сите области. Дејствуваме врз нивните структури, логистика и финансиски текови. Пораката е јасна – никој не е над законот, без селективност и без привилегии“, порача Јанев.На свеченоста беше истакнато дека Министерството продолжува со реформите, модернизацијата и јакнењето на институционалните капацитети, со цел изградба на професионална и ефикасна европска полиција, која ќе биде сервис на граѓаните и гарант на правниот поредок.Пред почетокот на централната прослава, делегации на Министерството положија цвеќе пред спомен-обележјата на загинатите полициски службеници, оддавајќи почит на нивната жртва и придонес за безбедноста на државата.Одбележувањето продолжува и попладнево во Градскиот парк, каде граѓаните ќе можат да ја видат полициската опрема, да се дружат со службениците и да присуствуваат на музички хепенинг на „Школка“ со настап на естрадни уметници.

Македонија | пред 1 седмица

Тошковски: Новата шалтер сала во МТВ – побрзи услуги и подобри услови за граѓаните и вработените

Министерот за внатрешни работи Панче Тошковски денеска ја пушти во употреба новата шалтер сала во Одделението за управни работи – Скопје, сместено во зградата на МТВ, со што, како што рече, се овозможуваат побрзи и поефикасни услуги за граѓаните.Со завршувањето на втората фаза од реконструкцијата, целосно е ставен во функција модерно уреден простор со над 10 шалтерски позиции, како и дополнителни канцеларии, санитарни простории, кујна и простор за архивирање на документација.Во новата сала, во почетната фаза, ќе се обезбедуваат услуги поврзани со постапки од областа на возилата, како и шалтерот „Безбеден град“, наменет за проверка и ажурирање на контакт-податоци на граѓаните, со најави за проширување на услугите во иднина.Тошковски истакна дека целта е модернизација на услугите и подобрување на условите за работа, нагласувајќи дека Министерството продолжува со инвестиции во инфраструктурата и јакнење на капацитетите.Според податоците од МВР, во изминатата година се пуштени во употреба и осум нови канцеларии за управни услуги низ државата, со што, како што се наведува, значително е олеснет пристапот на граѓаните до административни услуги.

Македонија | пред 1 седмица

Тошковски – Варнс: Потврдена определбата за зајакнување на стратешкото партнерство меѓу Македонија и САД

Министерот за внатрешни работи Панче Тошковски денеска оствари средба со вршителот на должност амбасадор на Соединетите Американски Држави во Македонија, Н.Е. Никол Варнс.На средбата беше потврдена заедничката определба за натамошно зацврстување на стратешкото партнерство меѓу двете земји, како и продолжување на интензивната соработка во клучните области од заеднички интерес.Соговорниците разговараа за продлабочување на соработката во областа на безбедноста, владеењето на правото и справувањето со современите безбедносни предизвици, со посебен осврт на резултатите од неодамнешната работна посета на Соединетите Американски Држави и стратешкиот дијалог што се одржа во Вашингтон.Беше констатирано дека билатералната соработка меѓу двете земји се одвива на високо ниво, при што партнерството со Соединетите Американски Држави претставува значаен придонес за унапредување на безбедносните капацитети и стабилноста во регионот.На средбата беше изразена заедничка подготвеност за понатамошно продлабочување на соработката и реализација на заеднички иницијативи во насока на јакнење на институционалните капацитети и регионалната безбедност.

Македонија | пред 1 седмица

Тошковски до Петровска: На дама, ваква груба манипулација не и доликува

На денешната седница за пратенички прашања, пратеничката од СДСМ Славјанка Петровска, од говорницата покажа фотографии од апсењето на директорот на Инспекторатот за земјоделство Илија Стоилов од ВМРО-ДПМНЕ. Како што рече, тоа било во подземната гаража на зграда на улица „Матеја Матевски“ каде што живее министерот за земјоделство Цветан Трипуновски.„Го уапсивте само директорот а не и крајниот корисник на тие средства“, рече Петровска, сомневајќи се дека МВР овој дел го заташка пред јавноста, потсетувајќи го министерот Панче Тошковски дека рекол: „И брат да е, ќе одговара”.„Морам да признаам дека инвентивноста од ден на ден ви е сѐ подобра. Имате тези кои се поблиску до научна фантастика, отколку до реалноста. Врз основа на поставените прашања, народот ќе ве цени вас. Согласно моите информации што ги добив пред неколку секунди, во рамки на предметниот објект живеат многу поранешни и сегашни функционери. Лицето е апсено таму каде што е апсено, зашто таму ги примило парите. Кој друг живее во тој објект искрено не знам, можеби вие подобро би знаеле од мене во предметниот објект.Но да направите обид за една ваква груба манипулација, на дама не и доликува. Ниски се овие удари да ја дефокусирате јавноста и уште еднаш ви честитам на инвентивниот пристап во начинот на скренување на вниманието на јавноста“, смеејќи се и одговори Тошковски.

Македонија | пред 2 седмици

Тошковски – Сјаојан: Продлабочување на соработката и зајакнување на партнерството во областа на безбедноста

Министерот за внатрешни работи Панче Тошковски денеска оствари работна средба со амбасадорката на Народна Република Кина во земјава, Џианг Сјаојан, на која било разговарано за продлабочување на соработката и зајакнување на партнерството во областа на безбедноста, соопштуваат од Министерството за внатрешни работи.На средбата било изразено взаемно задоволство од досегашната соработка, при што било оценето дека билатералните односи во делот на внатрешните работи бележат континуиран позитивен развој и се засноваат на заеднички принципи и интереси, стои во соопштението.Посебен акцент бил ставен на интензивирање на активностите во борбата против илегалната миграција, како и на продолжување на редовниот дијалог и координација меѓу надлежните институции.Соговорниците се согласиле дека стратешките цели на двете држави остануваат приоритет, при што било нагласено дека унапредувањето на соработката ќе придонесе за поефикасна реализација на заедничките политики, стои во соопштението.Средбата, како што информираат од МВР, се одвивала во конструктивна и пријателска атмосфера, со заедничка оценка дека постои цврста основа за понатамошно јакнење на партнерството меѓу двете земји.

Македонија | пред 2 седмици

Тошковски: Протоколот за лица без државјанство е значаен чекор кон системско и навремено решавање на овие случаи

Министерот за внатрешни работи Панче Тошковски се обрати на промоцијата на Протоколот за постапување со лица без државјанство, која се одржа заедно со министерот за здравство Азир Алиу и шефот на Мисијата на ОБСЕ во Скопје, амбасадорот Килијан Вал.На настанот беше нагласено дека протоколот претставува значаен инструмент за унапредување на институционалната координација и воспоставување системски пристап во идентификувањето и решавањето на случаите на лица без државјанство.Тошковски истакна дека МВР има проактивен пристап во справувањето со овој предизвик, нагласувајќи дека државјанството претставува основно човеково право и правна врска меѓу лицето и државата.Тој посочи дека во изминатиот период се преземени значителни напори за решавање на случаите на бездржавјанство и дека државата постигнала напредок, за што добила признанија од Обединетите нации, Европската комисија и Советот на Европа.Според него, новиот протокол ќе овозможи појасни процедури и подобра координација меѓу институциите, со цел навремено идентификување и ефикасно решавање на случаите, особено кај малолетните лица.Од МВР наведуваат дека Македонија, со поддршка на меѓународните партнери, продолжува со усогласување на законската и институционалната рамка со меѓународните стандарди за заштита на човековите права и намалување на бездржавјанството.

Македонија | пред 2 седмици

Тошковски: Полицијата ќе има пошироки овластувања и нови технолошки алатки во борбата против семејното насилство

Министерот за внатрешни работи Панче Тошковски на прес конференција, одговарајќи на новинарски прашања, се осврна на новите мерки и законски измени насочени кон зајакнување на борбата против семејното насилство, како и на улогата на полицијата во заштита на жртвите.Тој истакна дека зголемениот број на пријави за семејно насилство не мора нужно да значи и зголемување на самите случаи, туку, како што рече, е показател дека сè повеќе жртви се охрабруваат да пријавуваат.„Тоа го оценуваме како позитивен тренд – поголема доверба во системот и поголема подготвеност на жртвите да пријават насилство“, рече Тошковски.Министерот нагласи дека клучни промени се подготвуваат преку законски измени, кои ќе ги надминат постојните правни празнини и колизии, каде што жртвата, како што рече, понекогаш е ставена во дополнително незавидна позиција.Според најавите, полицијата ќе добие пошироки овластувања да реагира на терен, со можност веднаш да отстрани потенцијален сторител на насилство од домот, врз основа на проценка на непосредна опасност, без разлика на сопственоста на објектот.„Полицаецот ќе може, врз основа на конкретна проценка на ризик, да донесе одлука за итно отстранување на потенцијалниот сторител на насилство од објектот каде што постои закана“, истакна министерот, нагласувајќи дека конечната вина се утврдува во судска постапка.Тошковски додаде дека новиот пристап е усогласен со меѓународните стандарди, вклучително и Истанбулската конвенција.Посебен акцент, како што рече, се става и на технолошката модернизација на полицијата. Во таа насока, се предвидува воведување на бодикамери кај полициските службеници, како и интегрирани дигитални системи за снимање и евиденција на интервенциите.„Бодикамерите ќе овозможат објективно документирање на фактичката состојба на терен – дали имало закани, насилство или интервенција, со што се штитат и жртвите и полицајците“, рече тој.Дополнително, се развива и систем кој ќе овозможи, со согласност на жртвата, користење на аудио и видео докази преку мобилни уреди, со цел тие да бидат релевантни во судските постапки.Министерот нагласи дека целта на овие мерки е и репресивна и превентивна – односно, поефикасно санкционирање на сторителите, но и спречување на идни случаи.„Кога ќе постои свест дека секое дејствие може да биде документирано и доказно валидно, тоа ќе делува и превентивно“, додаде Тошковски.Тој најави и меѓуинституционална соработка, како и вклучување на други надлежни институции и невладини организации во системот за заштита на жртвите.„Потребен е системски пристап – со законски измени, технологија, обука и координација меѓу институциите. Само така може да се даде реален одговор на овој сериозен општествен проблем“, заклучи министерот.

Македонија | пред 2 седмици

Тошковски од Атина: Заеднички и координиран одговор на криминалот и тероризмот – зајакната соработка со Грција

Министерот за внатрешни работи Панче Тошковски денеска во Атина учествуваше на министерскиот состанок на Акаба процес посветен на борбата против организираниот криминал и тероризмот на Балканот, информираат од МВР. Тој се обрати на сесијата за идентификување на заканите и нивната меѓусебна поврзаност, стои во соопштението од Министерството.Во своето обраќање, Тошковски нагласи дека безбедносната реалност во регионот значително се менува, при што организираниот криминал, трговијата со дрога и тероризмот сè повеќе функционираат како единствена, хибридна закана. Според него, овие појави не можат повеќе да се третираат одвоено, туку бараат координиран и заеднички одговор, како што наведуваат од Министерството во соопштението.Министерот посочи дека станува збор за транснационални закани кои директно ја поврзуваат безбедноста на државите, нагласувајќи ја потребата од зајакнување на регионалната и меѓународната соработка, размена на информации и координација меѓу безбедносните и разузнавачките служби, стои во соопштението.Во рамки на посетата, Тошковски оствари билатерална средба со министерот за заштита на граѓаните на Грција, Михалис Крисохоидис, на која е потврдена подготвеноста за унапредување на соработката меѓу двете земји. Разговарано е за борбата против организираниот криминал, трговијата со дрога и нелегалната миграција, како и за унапредување на оперативната координација.Министрите се осврнаа и на предизвиците од имплементацијата на системот за влез/излез на ЕУ (ЕЕС), со акцент на намалување на времето на чекање на граничните премини во пресрет на туристичката сезона. Дополнително, станува збор и за усогласување на билатералниот договор за борба против криминалот и протоколот за реадмисија, стои во соопштението.На средбата се разменети информации за актуелната состојба со нелегалната миграција, при што е нагласена потребата од сеопфатен и координиран регионален пристап. Двајцата министри ја потврдија заедничката определба за продлабочување на соработката и зајакнување на безбедноста, стои во соопштението од Министерството.Воедно, по покана на Тошковски, Крисохоидис ќе ја посети земјава со цел дополнително унапредување на соработката, особено во борбата против организираниот криминал, стои во соопштението.

Македонија | пред 3 седмици

Тошковски со високи претставници на американските безбедносни служби: Интензивирана соработка меѓу МВР и американските безбедносни институции

Министерот за внатрешни работи Панче Тошковски престојувал во работна посета на Вашингтон, во рамки на втората сесија од Стратешкиот дијалог Македонија – САД, насочен кон унапредување на безбедносната соработка.Во текот на посетата биле остварени повеќе средби со високи претставници на американските безбедносни институции, меѓу кои од Дипломатската безбедносна служба, ФБИ, ICITAP програмата и Бирото за меѓународни наркотици и спроведување на законот.На средбите било констатирано дека Македонија е препознаена како доверлив безбедносен партнер на Соединетите Американски Држави, а соработката се продлабочува во повеќе клучни области од заеднички интерес.Фокусот на разговорите бил ставен на борбата против трговијата со луѓе, нелегалната трговија со дрога, транснационалниот организиран криминал, зајакнувањето на граничната безбедност и справувањето со тероризмот.Била нагласена и континуираната поддршка преку ICITAP програмата, особено во насока на јакнење на институционалните капацитети, обуки и модернизација на полициските структури.Посетата е оценета како потврда на стратешката определба за продлабочување на партнерството со САД и за натамошно интензивирање на соработката во безбедносната сфера.

Македонија | пред 4 седмици

Тошковски од Вашингтон: Стратешкиот дијалог со САД носи конкретни резултати за безбедноста

Министерот за внатрешни работи Панче Тошковски учествува во Стратешки дијалог Македонија – САД, кој се одржува во Вашингтон, каде што се одржува втората сесија од овој важен билатерален процес.Стратешкиот дијалог претставува значајна платформа за продлабочување на соработката меѓу Северна Македонија и Соединетите Американски Држави, со фокус на безбедноста, владеењето на правото и институционалниот развој.Во рамки на дијалогот, Министерството за внатрешни работи става силен акцент на зајакнување на граничната безбедност, борбата против организираниот криминал, нелегалната миграција и трговијата со дрога, како и унапредување на разузнавачката соработка со партнерските служби.„Стратешкиот дијалог со Соединетите Американски Држави е важен процес што носи конкретни резултати за безбедноста на нашите граѓани. Преку ова партнерство обезбедуваме посигурни граници, поефикасна борба против криминалот и модерни, отпорни институции“, истакна министерот Тошковски.Особено значајна е поддршката од страна на САД во износ од над 3,5 милиони долари, наменета за јакнење на капацитетите на Министерството за внатрешни работи, што претставува директна инвестиција во безбедноста на државата.Паралелно, се работи и на унапредување на сајбер безбедноста преку техничка поддршка, обуки и модернизација на системите, со цел поефикасна заштита на институциите и критичната инфраструктура.Соединетите Американски Држави остануваат најважен стратешки партнер на државата и силен сојузник во зајакнувањето на безбедноста, стабилноста и демократските капацитети.

Македонија | пред 1 месец

„По две децении го враќаме средното полициско училиште“, вели Тошковски

Министерот за внатрешни работи Панче Тошковски денеска учествуваше на научно-стручната конференција „Психофизичка подготвеност на припадниците на безбедносните институции во Македонија“, во организација на Факултет за безбедност - Скопје.„Често зборуваме за опрема, закони и реформи, но суштината на системот се луѓето. Ако тие не се подготвени, ниту една стратегија нема да даде целосен резултат.Полициската професија денес значи работа во динамични, непредвидливи и стресни услови, каде одлуките се носат брзо и имаат директно влијание врз безбедноста на граѓаните. Затоа, психофизичката подготвеност не е дополнителна вредност, туку основа на професионалноста.Како Министерство, работиме на системски пристап, од селекција, преку обука, до континуирана поддршка во текот на кариерата. После повеќе од 20 години, го враќаме средното полициско училиште, како темел за создавање нови генерации професионални, подготвени и посветени полицајци.Верувам дека поврзувањето на науката и практиката е клучно за креирање подобри политики и услови за работа на полициските службеници. Инвестирањето во нивната подготвеност значи инвестирање во безбедноста на сите граѓани“, вели Тошковски

Македонија | пред 1 месец

(Видео) Тошковски до Пашоли: Како ви текнува, се будите од сабајле и оп, сејф сити само Албанците ги фаќа?

Министерот за внатрешни работи Панче Тошковски, денеска во Собранието одговараше на прашања од пратеничката Арбана Пашоли, при што ја повика пратеничката да се посвети и да си ја заработи платата за која како што вели седи во „таа убава фотелја“.„Многу ми е жал што не можете да излезете од оној вакум на етнички предзнак кога говориме за професионалност, кога говориме за системски реформи, кога говориме за сејф сити, па велите само Албанците ги фаќала камерата. Кај ви текнуваат овие работи? Стварно не ми е јасно. Камерата на сејф сити фаќала само Албанци. Ја не знам, тој што ви ги дава идеите, што ги смислува приказните ,значи, стварно, ако го плаќате, престанете да го плаќате, смислете нешто сами, верувајте ми дека поефикасни ќе сте.Се намалувал процентот на менаџерски кадар во Министерството за внатрешни работи, Албанците ќе останале без менаџерски позиции. Па кој ви ги кажува овие работи? Стварно не ми е јасно. Како ви идат, како ви текнуваат, се будите од сабајле и оп, камерата, само Албанците ги фаќа. Е, како бе така? Значи, ве замолувам, за општото добро на сите, посветете се да си ја заработите платата за која што сте седнати во таа убава фотелја.И ве замолувам, еднаш станете на оваа говорница и еднаш поставете прашање, еве не мора за Македонците, еве прашајте за Грците. Може за Грците да прашате? Ева за Грците прашајте како се третирани од Министерството за внатрешни работи“, изјави ТошковскиТој на крајот додека дека граѓаните на општина Липково и на Желено (1:44) и на Сарај имаа по-добри услови за остворување на своите права од кога е ВМРО-ДПМНЕ на власт„А вас може да биде и криво за тоа, ама, здравје, има време ќе докажeте во иднина“, изјави Тошковски

Македонија | пред 1 месец

Тошковски: „Нула корупција во полицијата“ – промовиран Планот за професионален интегритет 2026–2028

Министерот за внатрешни работи Панче Тошковски денеска се обрати на промоцијата на „Планот за професионален интегритет 2026–2028“ на Министерството за внатрешни работи, активност која се реализира во рамки на програмата на ДЦАФ за реформи во разузнавачкиот и безбедносниот сектор во Македонија 2021–2026.Настанот беше посветен на претставување на стратешките приоритети, институционалните обврски и конкретните мерки утврдени во новиот План, чија цел е унапредување на интегритетот, транспарентноста и одговорноста во работењето на полицијата.Во своето обраќање, министерот Тошковски истакна дека интегритетот претставува темел на современата и професионална полициска служба, нагласувајќи дека вредности како чесност, доверба, праведност и одговорност се суштински за зајакнување на владеењето на правото и довербата на граѓаните.„Планот за професионален интегритет 2026–2028 претставува значаен инструмент во борбата против корупцијата, со кој се предвидува јакнење на капацитетите во областа на етиката и професионалните стандарди. Нашата цел е јасна – нула корупција во полицијата. Само со доследна примена на законите, транспарентност и одговорност можеме да изградиме институција во која граѓаните ќе имаат целосна доверба“, нагласи министерот Тошковски.Тој потенцираше дека Министерството за внатрешни работи, во координација со Владата, континуирано работи на унапредување на механизмите за превенција, детекција и санкционирање на корупцијата, како и на зајакнување на професионалните компетенции на полициските службеници преку обуки и развој на етичките стандарди.Министерот истакна дека Планот, заедно со Акцискиот план, претставува цврста основа за понатамошен развој на демократска, транспарентна и одговорна полиција, усогласена со европските стандарди и принципите на заштита на човековите права.Воедно, Тошковски изрази благодарност до Европската Унија, како и до Швајцарија, Шведска и Холандија, како и до ДЦАФ и проектниот тим за нивната континуирана поддршка во спроведувањето на реформите во безбедносниот сектор.

Македонија | пред 1 месец

Тошковски барал да се отвори истрага за лажните боледувања во МВР: Ми беше како трн во око

Министерот за внатрешни работи Панче Тошковски денес рече дека на негово барање била иницирана истрагата на Фондот за здравствено осигурување, која од 500-тини боледувања кај вработени во МВР откри дека 100 од нив се добиени со неправилности.„Еднс од најфрапантните констатации коишто ги имав во мојот живот генерално, е процентот на боледувања на секој месец во рамки на Министерството за внатрешни работи кога седнав на таа позиција во рамки на техничка влада. Значи, тој процент на боледувања се движи отприлика негде околу 10% во континуитет. И сега, тоа вака ми беше како трн во око, на мое барање, беше отворена истрага во рамки на внатрешна контрола во Министерството, на мое барање лично беше вклучен и ФЗО во рамки на проверките коишто треба да се извршат кај докторите. Поради тоа, беше отворена истрага во рамки на Одделот за внатрешна контрола којашто сè уште не е затворена.По случаен избор биле одбрани одреден број на случаи, каде што, согласно она што го видов, секој четврти или секој петти од контролираните има индиции дека го злоупотребувал боледувањето. Значи, тоа е катастрофа вака, како процент, ако сме реални. Ова коешто беше констатирано од страна на фондот, се пропусти коишто ги вршеле лекарите. Во рамки на процесуирањето на барањата за боледување на, во конкретниот случај, полициските службеници“, изјави Тошковски.

Македонија | пред 1 месец

Тошковски за случајот со Анакиев: Нема недопирливи, секој којшто ќе се огреши со рекетирање и корупција ќе одговара

Министерот за внатрешни работи Панче Тошковски изјави дека апсењето на директорот на Државниот инспекторат за земјоделство, Васе Анакиев, кој беше фатен со 50 илјади евра поткуп, е јасен доказ за неселективната борба против корупцијата. Тој нагласи дека осомничениот бил фатен на лице место со претходно обележани пари, во координирана акција со Јавното обвинителство.„Ова е еден од случаевите коишто ја потврдува неселективната борба на Министерството за внатрешни работи посебно против оние коишто го срамат својот народ од позиција на директор којшто му била дадено функција од страна на народот преку собрание, влада итн. Истиот е фатен во рамки на постапка како рекетира наводно, еве да го употребам и тој термин, заради тоа што нели немаме правосилна пресуда, но од позиција на министер за внатрешни работи слободно можам да кажам дека на лице место е фатен со одредена сума на пари коишто претходно беа соодветно обработени обележани итн. во соработка со јавното обвинителство при што ова не е прв предмет ваков тип имавме повеќе во изминатиот период и покажавме дека навистина кога обвинителството и министерството за внатрешни работи бирото за јавна безбедност одделот за организиран криминал заеднички функционираат координирано резултатите може да бидат навистина поразлични од она што биле претходно. Со ова упатуваме една многу силна порака а тоа е дека нема недофатливи, нема недопирливи секој којшто ќе се огреши особено на штета на македонските граѓани со рекетирање и корупција ќе одговара“, изјави Тошковски.

Македонија | пред 1 месец

Тошковски: Ќе следи целосна ревизија на законите за насилство врз жени и деца

Министерот за внатрешни работи Панче Тошковски на новинарско прашање денес одговори дека изминатиот период во полициските билтени има голем број на пријави за семејно насилство поради тоа што жртвите се охрабриле да пријавуваат.„Во последните 30-ина години имаме зголемен број случаи коишто се поврзани со семејно насилство, согласно она коешто го добивам како информација во рамки на последните неколку недели, каде што интензивно сум посветен на оваа тема. Согласно информациите коишто ги добивам од Бирото за јавна безбедност, ако претходно сме имале еден до два случаи неделно, сега имаме по неколку случаеви дневно. Со тоа што само викендов имавме повеќе од 10 пријави за семејно насилство. Тоа говори дека жртвите се охрабрени да го пријават насилството. Тоа говори дека на еден начин имаме побудни институции, не само во делот на Бирото за јавна безбедност и секторите за внатрешни работи при Министерството за внатрешни работи, тука и во рамки на останатите институции.Таму каде што институциите направиле пропусти, треба да се изврши ревизија на институционалните чекори коишто се превземени, да се утврди конкретна одговорност со име и презиме на оние коишто потфрлиле во рамки на постапувањето. Од една страна, а од друга страна да се увидат системски подобрувања коишто ите како ќе треба да ги направиме во иднина, не само од аспект на промена на законска легислатива којашто констатиравме на оние состаноци кои ги имаме со Министерството за труд, невладините организации и луѓето коишто работат долги години и се професионалци во оваа област, во рамки на институциите, но и надвор од нив, констатиравме во суштина два две фази на чекори коишто ќе треба да следат. Први, итни измени, на законските прописи, таму каде што имаме детектирано директна колизија на законските одредби и неможност да ефективно се делува од страна на институциите. Пример беше ситуацијата со укинувањето на одлуките на основните судии од страна на апелационите судови заради тоа што жртвата не била заедно со сторителот соочени во рамки на една парнична постапка којашто се води по подигнување на итни мерки од страна на. Или институциите или од страна на самата жртва. Таквиот процес дополнително ја виктимизира жртвата а притоа апелација укинува одлуки заради тоа што жртвата не била на рочиштето заедно со насилникот. Ова е само еден пример на одредби коишто наместо да решаваат проблеми, тие мултиплицираат проблеми и заради тоа оценивме дека се потребни итни измени на делот законската легислатива на којшто интензивно се работи, од страна на групата којашто беше формирана и ќе се влезе во чекор на на измена во рамки на оваа прва фаза.Втора фаза, ќе следи со целосна ревизија на целокупната законска легислатива којашто се однесува на семејно насилство. Особено на насилство спрема жени и насилство спрема деца“, изјави Тошковски.

Македонија | пред 1 месец

Тошковски отвараше конференциска сала во ПС Бит Пазар

Министерот за внатрешни работи, Панче Тошковски, денеска заедно со амбасадорот на ОБСЕ во Скопје, Килијан Вал, ја отвори целосно реновираната конференциска сала во полициската станица Бит Пазар, нагласувајќи дека инвестицијата во инфраструктурата и капацитетите на полицијата значи подобри услови за работа, обука и координација на службениците и поефикасна и попрофесионална полиција.„Овој проект е резултат на одличната соработка помеѓу Министерството за внатрешни работи и ОБСЕ – партнерство кое носи конкретни и видливи резултати.Со ова вложување обезбедуваме подобри услови за работа, обука и координација на полициските службеници. Кога инвестираме во инфраструктурата и капацитетите, директно инвестираме во поефикасна и попрофесионална полиција.Ќе продолжиме да градиме модерни и функционални услови, затоа што силните институции се темел на безбедно општество“, вели Тошковски.

Скопје | пред 1 месец

Тошковски: Специјалната антитерористичка единица ‘Тигар’ е еден од клучните столбови во безбедносната структура на МВР

Денеска беа одбележани 45 години од формирањето на Специјалната антитерористичка единица „Тигар“ при Бирото за јавна безбедност на Министерството за внатрешни работи – една од најреномираните и највисокопрофесионални полициски формации во државата.На настанот се обрати министерот за внатрешни работи Панче Тошковски, кој истакна дека во изминатите четири и пол децении САЕ „Тигар“ изградила репутација на врвна професионална единица, чија обученост, дисциплина и посветеност претставуваат гордост за Министерството за внатрешни работи и за целата држава.„Специјалната антитерористичка единица ‘Тигар’ претставува еден од клучните столбови во безбедносната структура на Министерството за внатрешни работи. Оваа високоспецијализирана единица мора во секој момент да биде целосно подготвена – технички, професионално и човечки – за да одговори на најсложените задачи и операции“, истакна министерот Тошковски.Тој нагласи дека САЕ „Тигар“ останува меѓу врвните приоритети на Министерството за внатрешни работи, при што ќе продолжат инвестициите во подобрување на условите за работа, модерна опрема и континуирана обука на припадниците на единицата.Министерот посочи дека припадниците на „Тигар“ се клучен дел од најсложените оперативни акции на МВР и се на првата линија во борбата против најтешките форми на криминал.Само во текот на 2025 година припадниците на единицата учествувале во 26 акции, обезбедувале повеќе десетици настани и реализирале 13 заеднички вежби со сродни полициски и армиски единици од земјата и странство, меѓу кои и со Зелените беретки од Армијата на Соединетите Американски Држави.Покрај тоа, тие редовно учествуваат на обуки и натпревари на кои постигнуваат врвни резултати, а во рамки на спасувачките мисии само во изминатата година спасиле пет повредени лица.Во своето обраќање министерот Тошковски истакна дека најголемата сила на единицата се нејзините припадници – нивниот професионализам, знаење, интегритет и пожртвуваност.„Успешните операции, богатото искуство и високите стандарди што ги постави ‘Тигар’ се обврска за сите нас тие стандарди не само да ги зачуваме, туку и постојано да ги унапредуваме“, нагласи Тошковски.Тој упати честитка до сите припадници на единицата по повод јубилејот, изразувајќи уверување дека САЕ „Тигар“ и во иднина ќе продолжи да биде симбол на професионалност, храброст и врвна подготвеност во служба на државата и граѓаните.Припадниците на САЕ „Тигар“ презентираа и видео-преглед на активностите на единицата во текот на 2025 година. По тој повод, во рамки на одбележувањето на 45 години од формирањето на единицата, беа доделени плакети, благодарници и награда за најдобриот припадник на Единицата за 2025 година. Исто така, плакети им беа врачени на припадници за 15 и 25 години служба во единицата, како и на соработници и пријатели на единицата.Во текот на денот делегации на министерот за внатрешни работи, директорот на бирото за јавна безбедност, семејства на загинатите припадници од Оддделот за специјални полициски операции и други делегации положија свежо цвеќе пред спомен-обележјето на САЕ „Тигар“, во чест на хероите кои ги дадоа своите животи извршувајќи ја најсветата дожност - да ја бранат татковината и безбедноста на граѓаните.

Македонија | пред 2 месеци

Тошковски во увид на изградбата на новата полициска станица во Аеродром: Инвестираме во современи услови за работа на полицијата и поквалитетни услуги за граѓаните

Министерот за внатрешни работи Панче Тошковски денеска изврши увид во градежните активности на новата полициска станица во општина Аеродром, која претставува еден од капиталните инфраструктурни проекти на Министерството за внатрешни работи.Изградбата на новиот објект е дел од поширокиот процес на унапредување на условите за работа на полициските службеници, но и на квалитетот на услугите што Министерството ги обезбедува за граѓаните. Во рамки на овој процес, во изминатиот период беше пуштена во употреба целосно реновирана полициска станица во Бутел, како и осум нови канцеларии за управни работи ширум државата. Меѓу нив се и новите канцеларии за граѓански работи на СВР Скопје во објектот на МТВ, кои овозможуваат побрзо, поефикасно и покомфорно остварување на услугите за лични документи и други административни потреби на граѓаните.Континуирано инвестираме во подобрување на условите за работа на полициските службеници и во модернизација на услугите што ги добиваат граѓаните. Новата полициска станица во Аеродром ќе биде современ објект кој ќе обезбеди подобра организација на работата, повисоко ниво на безбедност и поквалитетна услуга за граѓаните“, истакна министерот Тошковски при увидот.Според информациите од терен, градежните активности се одвиваат според планираната динамика, а објектот се очекува целосно да биде завршен до крајот на мај.Новата полициска станица е проектирана со главен влез за граѓаните од страната на булеварот, со цел полесен и попрактичен пристап, како и дополнителен влез на задната страна за службени потреби. Објектот располага со 36 паркинг места и целосно уредена атмосферска и фекална канализација, а гасоводните инсталации се заштитени според највисоки безбедносни стандарди.Фасадата на објектот е речиси целосно завршена, а предвидени се три главни влезови – за управните служби, за полициските служби и посебен притворски влез. Внатрешноста на објектот е опремена со современи простории за работа, вклучително и посебно опремени простории за работа со деца – жртви на насилство, изолирана оружарница, модерни сали за состаноци на секој кат, магацински простории, како и единаесет простории за задржување со специјални безбедносни врати и прозорци.Во објектот е предвидена и посебна просторија за препознавање, а инсталирано е и подно греење. Електричните инсталации и цевководите се веќе завршени, додека во тек е финалната фаза на поставување на подовите и системот за греење.

Македонија | пред 2 месеци

СДСМ бара оставка од Тошковски: „Доста е од жртви и трагедии“

СДСМ побара итна оставка од министерот за внатрешни работи Панче Тошковски, оценувајќи дека институциите потфрлиле во повеќе случаи на насилство и трагедии во државата.Од партијата посочуваат дека последната трагедија во скопската населба Карпош, во која животите ги загубија мајка и нејзината малолетна ќерка, силно ја потресла јавноста.„Уште колку животи треба да згаснат за да има одговорност? Уште колку трагедии треба да се случат за Панче Тошковски да поднесе оставка? Јавноста е во тага, во шок, но и во огромен бес“, се наведува во реакцијата на СДСМ.Според партијата, во случајот со Ивана, која подолг период пријавувала семејно насилство, биле поднесени 12 пријави во период од две години, но, како што велат, институциите не реагирале навреме.СДСМ потсетува и на други случаи на насилство, меѓу кои убиствата во Велес, случајот во кумановско Старо Нагоричане, како и трагедијата во Кочани, оценувајќи дека сите тие, според нив, укажуваат на системски пропусти.„Сите овие трагедии имаат заедничка точка – систем што потфрла и МВР што не реагира навреме“, наведуваат од партијата.Од СДСМ обвинуваат дека наместо да преземе одговорност, министерот Тошковски се обидува да ја префрли вината, додавајќи дека јавноста заслужува одговори.„Нема да молчиме. Доста е од жртви и трагедии. Одговорност мора да има. Оставка од Панче Тошковски – веднаш“, порачаа од СДСМ.

Македонија | пред 2 месеци