Тошковски: Значително намален бројот на жртви во сообраќајот, Македонија во конкуренција за светско признание за сообраќајна безбедност

Бројот на загинати во сообраќајни несреќи во Македонија бележи значително намалување. Во првите десет месеци од 2026 година животот го загубиле 84 лица, наспроти 117 во истиот период лани, што е за 33 жртви помалку, информираше министерот за внатрешни работи Панче Тошковски на промоцијата на Националната стратегија за безбедност на сообраќајот на патиштата за периодот 2026–2030 година.

— реклама —

Тошковски посочи дека во изминатите 35 години на македонските патишта годишно во просек загинувале околу 150 лица, што ја нагласува потребата од системски пристап кон подобрувањето на сообраќајната безбедност.

— реклама —

Тој им се заблагодари на граѓаните за посовесното однесување во сообраќајот, оценувајќи дека тоа, заедно со активностите на институциите, превентивните кампањи и поддршката од компаниите и граѓанските организации, придонело за намалување на бројот на несреќи и жртви.

Новата национална стратегија предвидува до 2030 година бројот на загинати во сообраќајни несреќи да се намали за 50 проценти во однос на 2024 година. Документот се темели на принципот „Секој живот е важен“, а предвидува координирани активности за превенција, едукација, подобрување на сообраќајната култура и примена на современи технологии.

— реклама —

Министерот информираше и дека Министерството за внатрешни работи е меѓу петте селектирани институции за потенцијална награда на Светскиот полициски самит во Дубаи, заедно со полициски служби од Сингапур и Обединетите Арапски Емирати.

— реклама —

Тошковски порача дека за намалување на бројот на жртви се неопходни заедничка одговорност, почитување на сообраќајните правила и континуирана посветеност на институциите.